ہلاک خارجی دہشت گرد حذیفہ کی والدہ کی جانب سے عوام کے لئے خصوصی پیغام سامنے آگیا۔

سیکیورٹی ذرائع کے مطابق فتنہ الخوراج کی دہشت گردی سے خیبرپختونخوا میں متاثرین کی ایک بڑی تعداد انتہا پسندی کو مسترد کررہی ہے۔

سیکیورٹی ذرائع کا کہنا ہے کہ ڈیرہ اسماعیل خان میں ہلاک دہشت گردوں کے خاندان اور قبیلے نے لاتعلقی کا اعلان کردیا ہے۔

یاد رہے کہ 15 اپریل 2025 کو ڈیرہ اسماعیل خان کے علاقے کلاچی میں سیکیورٹی فورسز کے آپریشن میں 4 خارجی ہلاک ہوئے تھے جب کہ ہلاک دہشت گردوں میں رنازئی قبیلے سے تعلق رکھنے والاخارجی حذیفہ عرف عثمان بھی شامل تھا۔

خارجی ‏دہشت گرد حذیفہ عرف عثمان کی والدہ نے ویڈیو پیغام جاری کیا ہے جس میں انہوں نے کہا کہ حذیفہ عرف عثمان میرا بیٹا تھا اور وہ فوج کے ہاتھوں مارا گیا جب کہ میرا بیٹا حذیفہ میرا اور والد کا نافرمان تھا۔

ہلاک دہشت گرد کی والدہ نے بتایا کہ ہم نے حذیفہ کو بہت سمجھایا، والد نے بہت بار ڈانٹا بھی مگر اس پر ہماری بات کا کوئی اثر نہیں ہوتا تھا۔

دفاعی ماہرین کہتے ہیں کہ فتنہ الخوراج کے خلاف خیبرپختونخوا کے عوام اٹھ کھڑے ہوئے ہیں جس کی واضح مثالیں حالیہ دنوں میں سامنے آئی ہیں۔

دفاعی ماہرین کا کہنا ہے کہ فتنتہ الخوراج کم عمر پاکستانی قبائلی نوجوانوں کو دہشت گردی کی آگ میں ایندھن کے طور پر دہشت گردی میں استعمال کررہے ہیں جب کہ ہلاک دہشت گرد حذیفہ کی والدہ کا بیان فتنتہ الخوارج کی شکست ہے۔

ماہرین نے کہا کہ فتنتہ الخوراج کی صفوں میں شامل دہشت گردوں کے والدین کی جانب سے اظہار لاتعلقی اور دیگر بیانات کا سلسلہ عوام کے دہشت گردی سے متنفر ہونے کا واضح ثبوت ہے۔ مذہب کا لبادہ اوڑھے فتنتہ الخوارج کے دہشت گرد پاکستانی عوام کے کھلے دشمن ہیں۔

دفاعی ماہرین مزید کہتے ہیں کہ پاکستانی عوام کو چاہیے کہ فتنہ الخوارج کے گھناؤنے چہرے کو پہچانیں اور اپنے بچوں کوخوارج کے پروپیگنڈے کا شکار ہونے سے بچائیں۔ یہ بات ثابت کرتی ہے کہ پاکستان میں دہشت گردی کی کوئی جگہ نہیں ہے۔