اسلام آباد: وزیراعظم محمد شہبازشریف نے کہا ہے کہ علامہ محمد اقبال کے نظریات کو اپنا کر خود مختار اور ترقی یافتہ پاکستان کی تعمیر کریں گے۔

وزیراعظم شہبازشریف نے ڈاکٹر علامہ محمد اقبال کے یوم وفات پر ان کو خراج عقیدت پیش کیا اور کہا کہ علامہ اقبال پاکستان کے نظریاتی معمار اور پہلے مفکر تھے۔

انہوں نے کہا کہ علامہ اقبال نے برصغیر کے مسلمانوں کے لیے علیحدہ مملکت کا تصور پیش کیا اور مسلمانوں کو سیاسی، فکری، روحانی طور پر متحد کیا۔

شہبازشریف نے کہا کہ علامہ اقبال کے فلسفہ خودی، شاعری نے تحریک پاکستان کو نظریاتی بنیاد فراہم کی، انہوں نے علم، عمل، یقین محکم، خود اعتمادی پر زور دیا جو آج ہماری تمام مشکلات کا حل ہیں۔

وزیراعظم نے مزید کہا کہ علامہ اقبال نے نوجوانوں کو جہد مسلسل، حصول علم، اعلیٰ اخلاقی اقدار اپنانے کی تلقین کی، ان کے نظریات کو اپنا کر خود مختار، ترقی یافتہ پاکستان کی تعمیر کریں گے۔