اسلام آباد: عالمی مالیاتی ادارے (آئی ایم ایف) نے پاکستان کی معاشی شرح نمو کی پیشگوئی 3 فیصد سے کم کر کے 2.6 فیصد کر دی۔

عالمی مالیاتی ادارے نے نئی ورلڈ اکنامک آؤٹ لک رپورٹ اپریل 2025 جاری کردی جس میں بتایا گیا ہے کہ پاکستان کی معاشی شرح نمو کا تخمینہ 3 فیصد سے کم کر کے 2 اعشاریہ 6 فیصد کر دیا گیا اور اگلے مالی سال کیلئے پاکستان کی شرح نمو کا تخمینہ 3.6 فیصد لگایا گیا ہے۔

اس کے علاوہ کرنٹ اکاؤنٹ خسارے کے تخمینے کو جی ڈی پی کے ایک فیصد سے کم کرکے 0.1 فیصد کردیا گیا ہے جبکہ اگلے مالی سال کرنٹ اکاؤنٹ خسارہ جی ڈی پی کے 0.4 فیصد رہنے کی توقع ہے۔

اپنی تازہ ترین رپورٹ میں آئی ایم ایف نے حکومت کے نجکاری پلان اور کاروباری ماحول کی بہتری کے لیے اصلاحاتی ایجنڈے کی حمایت کی اور ٹرمپ ٹیرف سے پیدا ہونے والی غیر یقینی صورتحال کی وجہ سے عالمی اقتصادی نمو کو بھی تبدیل کردیا۔

رپورٹ میں مزید بتایا گیا کہ رواں مالی سال آئی ایم ایف نے پاکستان میں افراط زر میں بہتری کی پیشگوئی کی ہے، افراط زر کا تخمینہ 10 فیصد سے کم کر کے 5.1 فیصد کردیا گیا جبکہ اگلے سال افراط زر کے 7.7 فیصد تک رہنے کی توقع ہے۔

واضح رہے کہ جنوری میں آئی ایم ایف نے رواں مالی سال کے لیے پاکستان کی معاشی شرح نمو کا تخمینہ کم کر کے 3 فیصد کر دیا تھا، اس کی پیشگوئی اس سے قبل 3.2 فیصد کی گئی تھی۔