اسلام آباد: پاکستان کے دفتر خارجہ نے بھارتی ناظم الامور کو طلب کر کے ان کے ملک کی جانب سے کیے گئے جارحانہ اقدامات پر احتجاجی مراسلہ تھما دیا۔

بھارت کے یکطرفہ اور اشتعال انگیز اقدامات پر دفتر خارجہ نے ردعمل دیتے ہوئے بھارتی ناظم الامور کو باضابطہ تحریری طور پر پاکستان کے سفارتی، تجارتی اور فضائی تعلقات محدود کرنے کے فیصلوں سے آگاہ کیا۔

ترجمان دفتر خارجہ کے مطابق پاک بھارت کشیدگی کے حوالے سے سیکریٹری خارجہ آمنہ بلوچ نے غیر ملکی سفارتکاروں کو بریفنگ دی اور اس دوران انہوں نے بھارتی ناظم الامور کو پہلگام حملے کے بعد ابھرتی صورتحال سے آگاہ کیا اور قومی سلامتی کمیٹی اجلاس کے فیصلوں سے آگاہ کیا۔

ترجمان کا کہنا تھا کہ آمنہ بلوچ نے پہلگام واقعے پر پاکستان کے خلاف بھارتی پروپیگنڈا مہم کو مسترد کردیا اور کہا کہ ایسے ہتھکنڈے خطے میں امن واستحکام کی راہ میں رکاوٹ بنیں گے۔

سیکریٹری خارجہ نے مزید کہا کہ پاکستان نے ہمیشہ ہرقسم کی دہشت گردی کی مذمت کی اور مسترد کیا، کشیدگی بڑھانے کی بھارتی کوششوں اور کسی مہم جوئی کے مقابلے کے لیے تیار ہیں۔