اسلام آباد: وزیراعظم شہباز شریف نے ایف بی آر پرفارمنس مینجمنٹ سسٹم کی افتتاحی تقریب سے خطاب میں کہا کہ قرضوں سے نجات اور معیشت کی بہتری کیلئے دن رات محنت ضروری ہے۔

وزیراعظم شہباز شریف کا تقریب سے خطاب کرتے ہوئے کہنا تھا کہ پاکستان کی معیشت کو قرضوں کے چنگل سے نکالنے کے لیے ملکی آمدنی میں اضافہ ناگزیر ہے اور اس مقصد کے حصول کے لیے اہداف پر تیزی سے پیشرفت یقینی بنانا ہوگی۔

وزیراعظم نے کہا کہ سرمایہ کار ہمارے سر کا تاج ہیں اور حکومت ان کو ہر ممکن سہولت فراہم کرے گی۔ معیشت کو مستحکم بنانے کے لیے ماضی کی غلطیوں سے سبق سیکھنا ہوگا اور ذمہ داری کے ساتھ آگے بڑھنا ہوگا۔

ان کا کہنا تھا کہ قرضوں کی وجہ سے معیشت پر بھاری بوجھ پڑ چکا ہے اور اگر ہم نے بروقت اقدامات نہ کیے تو یہ بوجھ مزید بڑھتا جائے گا۔ قرضوں سے جان چھڑانی ہے تو ملکی آمدنی بڑھانی ہوگی۔

وزیراعظم شہباز شریف نے کہا کہ ایف بی آر میں ماضی میں ٹریک اینڈ ٹریس نظام کو مؤثر انداز میں استعمال نہیں کیا گیا تاہم اب ہمیں جدید ٹیکنالوجی سے فائدہ اٹھاتے ہوئے ایف بی آر کی مکمل ڈیجیٹلائزیشن کی طرف بڑھنا ہوگا۔

انہوں نے یہ بھی کہا کہ اس ڈیجیٹلائزیشن کے سفر میں ایف بی آر کی پوری ٹیم نے مل کر کاوشیں کی ہیں اور اس سفر کا آغاز ہوچکا ہے۔

انہوں نے زور دیا کہ کارکردگی سے متعلق مختلف اداروں میں موجود نقائص کو دور کرنا ہوگا اور عدالتوں میں زیر التوا کھربوں روپے کے ٹیکس کیسز کے فوری فیصلے بھی انتہائی ضروری ہیں تاکہ محصولات میں مزید بہتری لائی جاسکے۔

وزیراعظم نے کہا کہ گزشتہ سال کے مقابلے میں ٹیکس محصولات میں 27 فیصد اضافہ قابل ستائش ہے۔ پاکستان کے روشن اور خوشحال مستقبل کے لیے شبانہ روز محنت کرنی ہوگی اور راستے میں حائل تمام مشکلات کو حل کرنا ہوگا۔