شہر قائد کے علاقے سپر ہائی وے جمالی پل، ڈی سیون بس اسٹاپ کے قریب تیز رفتار بس کے حادثے میں تین سالہ فرحان جاں بحق ہوگیا۔

 ریسکیو ذرائع کے مطابق، بچہ اپنی والدہ کے ہمراہ اپنی نانی کے گھر سپر ہائی وے آیا تھا، جہاں یہ المناک واقعہ پیش آیا۔

حادثہ اس وقت پیش آیا جب بچہ بس سے اتر رہا تھا اور بس کے ٹائر تلے آ کر کچل گیا، جس کے نتیجے میں وہ موقع پر ہی جاں بحق ہو گیا۔

ریسکیو حکام نے متوفی کی لاش اسپتال منتقل کر دی، جہاں اس کی شناخت فرحان ولد اسرار کے نام سے ہوئی۔ فرحان دو بہن بھائیوں میں سب سے بڑا تھا۔

پولیس نے فوری طور پر مسافر بس کو تحویل میں لے لیا اور ڈرائیور کو گرفتار کر لیا۔ حادثے کی تحقیقات جاری ہیں، اور  قانونی کارروائی شروع کر دی ہے۔

ورثاء بنا قانونی کارروائی کے لاش کو اسپتال سے لے گئے۔