وزیراعظم محمد شہباز شریف نے مارچ 2025 میں پاکستان کا کرنٹ اکاؤنٹ 1.2 بلین ڈالر سرپلس کی بلند ترین سطح پر پہنچنے پر اطمینان کا اظہار کیا ہے۔ ا

نہوں نے اس سنگ میل کو ملکی معیشت کے استحکام اور حکومتی پالیسیوں کی کامیابی کا مظہر قرار دیا۔

وزیر اعظم نے کہا کہ کرنٹ اکاؤنٹ کا سرپلس میں ہونا ایک مستحکم ہوتی ہوئی معیشت کی عکاس ہے۔ الحمدللہ، رواں مالی سال کے ابتدائی 9 مہینوں میں کرنٹ اکاؤنٹ کا مجموعی سرپلس 1.85 ارب ڈالر رہا ہے، جو ایک حوصلہ افزا پیش رفت ہے۔

وزیراعظم شہباز شریف نے حالیہ مثبت معاشی اشاریوں کو حکومتی معاشی پالیسیوں کی درست سمت کا ثبوت قرار دیتے ہوئے کہا کہ یہ کامیابی ریکارڈ ترسیلات زر، بڑھتی ہوئی برآمدات اور معاشی ٹیم کی انتھک کوششوں کے باعث ممکن ہوئی ہے۔

اُن کا کہنا تھا کہ حکومت معیشت کی پائیدار ترقی اور عوام کی خوشحالی کے لیے سنجیدہ اور مسلسل اقدامات کر رہی ہے، اور موجودہ معاشی بہتری اس عزم کا عملی اظہار ہے۔

وزیر اعظم نے مزید کہا کہ ہم پرعزم ہیں کہ پاکستان کو معاشی طور پر خودمختار اور خوشحال ریاست بنانے کے لیے تمام دستیاب وسائل بروئے کار لائیں گے۔