کورنگی کریک میں حالیہ دنوں میں لگنے والی پراسرار آگ کا معاملہ ابھی تک مکمل طور پر حل نہیں ہو سکا۔ کورنگی کریک کے سربراہ فیصل وٹو نے بتایا کہ آگ کے مقام پر موجود پاکستان پیٹرولیم لمیٹڈ (پی پی ایل) کی ٹیم ایئر کوالٹی کا ٹیسٹ کر رہی ہے اور ابتدائی طور پر گیس کی کوئی لیکج ظاہر نہیں ہو رہی ہے۔

فیصل وٹو نے مزید کہا کہ آگ خود بخود بجھ گئی ہے، تاہم پی پی ایل کی ٹیم اس بات کا جائزہ لے رہی ہے کہ آیا گیس کا اخراج اب بھی جاری ہے یا نہیں۔

انہوں نے یہ بھی واضح کیا کہ اگر گیس کا اخراج جاری رہا تو آگ کو دوبارہ بجھانے کے لیے مناسب اقدامات کیے جائیں گے۔

دن بھر پی پی ایل کی ٹیم نے واٹر پمپ لگا کر آگ کے مقام سے پانی نکالنے کی کوشش کی۔ فیصل وٹو نے کہا کہ کنٹونمنٹ بورڈ کی ٹیموں سمیت دیگر متعلقہ ادارے بھی موقع پر موجود ہیں اور صورتحال پر مکمل نظر رکھی جا رہی ہے۔

حتمی رپورٹ پی پی ایل کی ٹیم تیار کرے گی، جس میں اس بات کا جائزہ لیا جائے گا کہ آیا گیس کا اخراج بند ہو چکا ہے یا آگ دوبارہ خطرہ بن سکتی ہے۔