وزیر اعظم پاکستان کی خصوصی ہدایات پر نیشنل ڈیزاسٹر مینجمنٹ اتھارٹی (این ڈی ایم اے) کی جانب سے فلسطین اور مشرق وسطیٰ کے جنگ زدہ عوام کے لیے امدادی سامان کی فراہمی کا سلسلہ جاری ہے۔

اس سلسلے میں جناح انٹرنیشنل ایئرپورٹ کراچی سے فلسطین کے لیے امدادی سامان کی 15 ویں کھیپ روانہ کر دی گئی۔

این ڈی ایم اے کے ترجمان کے مطابق، الخدمت فاؤنڈیشن کے تعاون سے بھیجی گئی اس کھیپ میں ادویات، حفظان صحت کی کٹس اور خیموں سمیت 40 ٹن امدادی سامان شامل ہے۔

امدادی سامان اتوار کے روز کراچی سے عمان (اردن) کے لیے روانہ کیا گیا، جہاں رائل میڈیکل سروسز اردن کی جانب سے اس امداد کو وصول کرنے کے بعد متاثرہ افراد میں تقسیم کیا جائے گا۔

مزید پڑھیں: غزہ کے لیے پاکستان سےامدادی سامان کی ساتویں کھیپ روانہ

این ڈی ایم اے اب تک براہ راست 15 خفیہ آپریشنز کے ذریعے 1,518 ٹن امدادی سامان غزہ بھجوا چکی ہے، جبکہ مجموعی طور پر 26 امدادی کھیپوں کے ذریعے 2,045 ٹن امدادی سامان فلسطین اور مشرق وسطیٰ کے جنگ متاثرین کے لیے روانہ کیا جا چکا ہے۔

ترجمان این ڈی ایم اے نے بتایا کہ حکومت پاکستان فلسطینی عوام اور مشرق وسطیٰ کے دیگر متاثرین کی ضروریات کو مدنظر رکھتے ہوئے امدادی سامان کی فراہمی کے سلسلے کو مسلسل جاری رکھے ہوئے ہے، تاکہ مشکل کی اس گھڑی میں پاکستان کی جانب سے انسانی ہمدردی کا جذبہ دنیا کے سامنے اجاگر ہو۔