راولپنڈی: جی ایچ کیو میں عسکری اعزازات دینے کی تقریب منعقد کی گئی جس میں آرمی چیف نے جوانوں اور افسران کو خراج تحسین پیش کیا۔

پاک فوج کے شعبہ تعلقات (آئی ایس پی آر) کے مطابق جی ایچ کیو راولپنڈی میں ایک پروقار تقریب کا انعقاد کیا گیا جس میں پاک فوج کے افسروں اور جوانوں کو جرأت، بہادری اور نمایاں خدمات پر عسکری اعزازات سے نوازا گیا۔

آئی ایس پی آر نے بتایا کہ تقریب کی صدارت چیف آف آرمی اسٹاف جنرل سید عاصم منیر، نشانِ امتیاز (ملٹری) نے کی جب کہ افسران اور جوانوں کو ستارۂ امتیاز (ملٹری) اور تمغۂ بسالت سے نوازا گیا۔

پاک فوج کے شعبۂ تعلقات عامہ کا کہنا ہے کہ ان اعزازات کا مقصد ملک کے لیے ان کی جرأت مندانہ خدمات، آپریشنل بہادری اور قربانیوں کو خراجِ تحسین پیش کرنا تھا۔

آرمی چیف کا خطاب

تقریب سے خطاب کرتے ہوئے آرمی چیف جنرل عاصم منیر نے کہا کہ شہداء اور غازی ہمارا فخر ہیں۔ ان کی قربانیاں ہی آج کے پاکستان میں امن اور آزادی کی بنیاد ہیں۔

انہوں نے مزید کہا کہ شہداء کا احترام ہر پاکستانی کے لیے مقدس فریضہ ہے اور ان کے اہل خانہ کے حوصلے اور قربانیوں کو بھی قوم ہمیشہ قدر کی نگاہ سے دیکھتی ہے۔

جنرل عاصم منیر نے انسدادِ دہشت گردی کے سلسلے میں پاک فوج اور قانون نافذ کرنے والے اداروں کے بے لوث کردار کو بھی سراہا اور کہا کہ ان کی قربانیاں قابلِ تحسین اور لائقِ فخر ہیں۔

آئی ایس پی آر نے مزید بتایا کہ تقریب کے دوران شہداء کے اہل خانہ کو بھی خصوصی طور پر مدعو کیا گیا، جہاں انہیں خراج عقیدت پیش کیا گیا اور ان کے صبر و استقامت کو سراہا گیا۔