اسلام آباد: پاکستانی ترسیلات زر نے سابق تمام ریکارڈ توڑ دیے، بیرون ملک مقیم پاکستانیوں کی جانب سے ترسیلات زر میں بڑا اضافہ ہوگیا ہے۔

اسٹیٹ بینک کے مطابق مارچ 2025ء میں ترسیلات زر پہلی مرتبہ 4 ارب امریکی ڈالر سے زائد ریکارڈ کی گئیں، مارچ میں اس مد میں 4.1 ارب  امریکی ڈالر کی آمد ہوئی۔

اسٹیٹ بینک کی جانب سے بتایا گیا ہے کہ نمو کے لحاظ سے ترسیلات زر میں سال بسال بنیادوں اور ماہ بہ ماہ بنیادوں پر بالترتیب 37.3 فیصد اور 29.8 فیصد اضافہ ہوا۔

رواں مالی سال جولائی سے مارچ 2025 کے دوران  ترسیلات زر سے رقوم کی آمد 33.2 فیصد اضافے کے ساتھ  28.0 ارب امریکی ڈالر تک پہنچ گئیں۔

اس کے علاوہ جولائی تا مارچ مالی سال 24ء میں 21.0 ارب امریکی  ڈالر موصول ہوئے تھے جبکہ مارچ 2025ء کے دوران ترسیلات زر کا بڑا حصہ سعودی عرب (987.3 ملین ڈالر)، متحدہ عرب امارات (842.1 ملین ڈالر) موصول ہوئے۔

اسٹیٹ بینک کے مطابق اسی عرصے میں برطانیہ سے (683.9 ملین ڈالر) اور امریکہ (419.5 ملین ڈالر) سے موصول ہوا۔