اسیر حریت رہنما یاسین ملک کی اہلیہ مشعال ملک نے بھارتی حکومت اور میڈیا کے مشترکہ کردار کو بے نقاب کرتے ہوئے کہا کہ پہلگام میں سیاحوں پر حملہ بھارتی میڈیا اور را کے گٹھ جوڑ کا نتیجہ ہے۔

مشعال ملک کا کہنا تھا کہ بھارت کشمیریوں کے خلاف مظالم کو چھپانے کے لیے اس طرح کے جھوٹے اور تخریبی ہتھکنڈے استعمال کرتا ہے۔

مشعال ملک نے مزید کہا کہ بھارتی میڈیا ہمیشہ کشمیریوں کے خلاف پروپیگنڈا میں پیش پیش رہا ہے، اور بھارت نے پہلے بھی غیر ملکی سربراہوں کے دوروں کے دوران ایسی حرکتیں کی ہیں۔

ان کا کہنا تھا کہ فالس فلیگ آپریشن کے بعد کشمیریوں کے گھروں پر چھاپے مارے جاتے ہیں تاکہ ان پر دباؤ ڈالا جا سکے اور ان کے حقوق کو مزید سلب کیا جا سکے۔

مشعال ملک نے کہا کہ مقبوضہ کشمیر میں انسانی حقوق مکمل طور پر سلب ہیں اور کشمیری عوام مسلسل ظلم و ستم کا شکار ہیں۔ مشعال ملک نے عالمی برادری سے اپیل کی کہ وہ مقبوضہ کشمیر میں بھارتی مظالم کا نوٹس لے اور کشمیریوں کے حقوق کے تحفظ کے لیے موثر اقدامات کرے۔