نیپرا نے کراچی کی بجلی ضروریات پر 110 صفحات کی دستاویزات جاری کر دی ہیں۔

نیپرا کی جانب سے جاری کردہ دستاویزات کے مطابق کراچی میں آئندہ 7 سالوں میں پاور سیکٹر میں 357 ارب روپے سرمایہ کاری کا دعویٰ کیا گیا، جبکہ نیپرا نے کے الیکٹرک کا 7 سالہ ملٹی ایئر ٹیرف کئی تبدیلیوں کے ساتھ منظور کرلیا۔

دستاویز میں بتایا گیا کہ کراچی میں آئندہ چند سالوں میں بجلی صارفین کی تعداد 50 لاکھ اور طلب 5 ہزار میگا واٹ پہنچنے کا امکان ہے، جبکہ کے الیکٹرک کے ملٹی ایئر ٹیرف میں ریٹرن ڈالر سے منسلک کردیا گیا، ٹیرف پر ہر سال نظرثانی ہوگی، تاکہ کمپنی اور صارفین دونوں کے تحفظ کو یقینی بنایا جاسکے۔

کے الیکٹرک کے مطابق نئے ٹیرف کے تحت بجلی یونٹ پر 3.31 روپے کا فرق آئے گا، تاہم صارفین پر اس کا بوجھ نہیں پڑے گا۔

یہ بھی پڑھیں: نیپرا نے کے الیکٹرک کیلئے 7 سالہ ٹیرف کی منظوری دے دی

دستاویز میں بتایا گیا کہ ملک میں یکساں بجلی ٹیرف کے باعث صارفین کیلئے بجلی کی قیمت پر اثر نہیں پڑے گا۔نئی ملٹی ایئر ٹیرف کی مدت مالی سال 2023–24 سے 2029–30 تک ہو گی، ٹرانسمیشن پر 12 فیصد ریٹرن آن ایکویٹی کی منظوری دی گئی۔

نیپرا دستاویز کے مطابق ڈسٹریبیوشن پر 14 فیصد ریٹرن آن ایکویٹی منظور کیا گیا، کےالیکٹرک نے ٹرانسمیشن پر 15 فیصد، ڈسٹریبیوشن پر 16.67 فیصد ریٹرن مانگا تھا، کے الیکٹرک نے ٹرانسمیشن پر آپریشن اینڈ مینٹیننس کی لاگت 9.22 ارب روپے کی درخواست کی تھی، نیپرا نے ٹرانسمیشن کیلئے آپریشن اینڈ مینٹیننس کی لاگت 6.66 ارب روپے منظور کی۔

دستاویز میں یہ بھی کہا گیا کہ ملٹی ایئر ٹیرف میں نقصانات کے اہداف میں نرمی نہ کرکے مقررہ ہدف برقرار رکھا گیا ہے، جبکہ کے-الیکٹرک ملٹی ایئر ٹیرف کی بنیاد پر کراچی میں مستقبل کی سرمایہ کاری کرے۔