راولپنڈی: افواجِ پاکستان نے حالیہ کشیدگی کے دوران بھارتی حملوں کا منہ توڑ جواب دیتے ہوئے اب تک اسرائیلی ساختہ 25 ہیروپ ڈرونز تباہ کر دیے۔

 پاک فوج کے شعبہ تعلقات عامہ (آئی ایس پی آر) کے مطابق یہ کامیابی سافٹ ویئر اور ہارڈویئر دونوں اقسام کی صلاحیتوں کی بدولت ممکن ہوئی۔

آئی ایس پی آر کا کہنا ہے کہ بھارت نے 6 اور 7 مئی کو بزدلانہ حملوں کے دوران جدید طیاروں، ڈرونز اور متعدد فوجی چوکیوں کو نشانہ بنایا، تاہم پاکستانی دفاعی نظام نے نہ صرف ان حملوں کو ناکام بنایا بلکہ جوابی کارروائی میں دشمن کو بھاری نقصان پہنچایا۔

ترجمان پاک فوج کے مطابق بھارت اسرائیلی ساختہ ہیروپ ڈرونز کے ذریعے پاکستان پر حملے کر رہا ہے، جو اس کی بوکھلاہٹ اور پریشانی کی واضح علامت ہے۔

آئی ایس پی آر نے مزید کہا کہ افواج پاکستان دشمن کومنہ توڑ جواب اور اسکے تمام عزائم خاک میں ملا رہی ہیں، پاکستانی مسلح افواج ہر قسم کی جارحیت کا مؤثر جواب دینے کی مکمل صلاحیت رکھتی ہیں۔