راولپنڈی: وزیراعظم شہباز نے معرکہ حق کے دوران آپریشن بنیان مرصوص کی فرنٹ لائنز کا دورہ کرتے ہوئے کہا کہ تاریخ گواہ ہے کہ چند گھنٹے میں بھارتی جارحیت کو خاک میں ملادیا گیا۔

پاک فوج کے شعبہ تعلقات عامہ (آئی ایس پی آر) کے مطابق وزیراعظم شہباز شریف نے معرکہ حق کے دوران آپریشن بنیان مرصوص کی فرنٹ لائنزکا دورہ کیا۔

آئی ایس پی آر نے بتایا کہ وزیراعظم شہبازشریف، نائب وزیراعظم اسحاق ڈار اور وفاقی وزراء نے پسرور کنٹونمنٹ کا دورہ کیا جب کہ اس موقع پر آرمی چیف جنرل عاصم منیر اور ایئرچیف مارشل ظہیر احمد بابر سدھو بھی ان کے ہمراہ  تھے۔

ترجمان پاک فوج کا کہنا ہے کہ وزیراعظم شہباز شریف کو جنگ کی صورتحال اور آپریشنل تیاریوں پر بریفنگ دی گئی جب کہ وزیراعظم نے آپریشن بنیان مرصوص میں شریک افسروں اور جوانوں سے ملاقات کی۔

وزیر اعظم کا اظہار خیال

اس موقع پر وزیر اعظم شہباز شریف نے کہا مسلح افواج نے دشمن کی جارحیت کا منہ توڑ جواب دیا، تاریخ گواہ ہے کہ چند گھنٹے میں بھارتی جارحیت کو خاک میں ملا دیا گیا۔

شہباز شریف کہتے ہیں کہ مسلح افواج نے بے مثال جرأت اور عزم کا مظاہرہ کیا جب کہ وزیراعظم نے اگلے مورچوں پر تعینات جوانوں سے تبادلہ خیال کیا اور ان کےعزم کو سراہتے ہوئے کہا کہ پاکستان کو بہادرجوانوں پر فخر ہے، بہادرجوان قوم کے سر کا تاج ہیں۔

وزیراعظم نے افواج پاکستان کو دشمن کے خلاف عظیم کامیابی پر مبارکباد دیتے ہوئے کہا کہ ہہ کامیابی رہتی دنیا تک تاریخ کے سنہری باب کاحصہ بن گئی ہے، ہماری بہادر افواج نے وطن عزیز اور 24 کروڑ عوام کے وقارمیں اضافہ کیا۔

دشمن کے گھمنڈ اورغرور کو خاک میں ملادیا

ان کا کہنا تھا کہ افواج پاکستان نے اپنی بہادری سے قوم کی عزت افزائی کی اور ہم نےعسکری مہارت، ہمت اور جوانمردی سے دشمن کو منہ توڑ جواب دیا۔ اللہ کے فضل سے اپنے سے کئی گنا بڑے دشمن کے گھمنڈ اور غرور کو خاک میں ملادیا۔

یہ بھی پڑھیں: آرمی چیف کی  زخمی اہلکاروں سے انفرادی طور پر ملاقات

شہباز شریف کہتے ہیں کہ ہمارے بہادرسپوتوں نے دشمن کو ایک انچ بھی آگے نہیں بڑھنے دیا، ہمارے شاہینوں نے دشمن کو جو ضرب لگائی یہ معمولی کارنامہ نہیں، پاکستان کو روایتی جنگ میں پیچھے چھوڑنے کے بھارتی دعوے خاک میں مل گئے۔

دنیا عسکری صلاحیتوں کی معترف

انہوں نے بتایا کہ آج دنیا پاکستان کی عسکری صلاحیتوں کی معترف ہے، عسکری قیادت اور افواج پاکستان کے ہر جوان اور افسر کو مبارکباد پیش کرتا ہوں۔ افواج پاکستان نے دشمن کے دانت توڑ دیے، کور کمانڈر نے بتایا کس طرح چوکی کا دفاع کیا اور دشمن کو آگے بڑھنے نہیں دیا۔

وزیر اعظم نے کہا کہ افواج نے زمین پر دشمن کے ٹھکانوں کو تباہ کیا اور پاک فضائیہ نے دشمن کے طیاروں کو مار گرایا، پاک فضائیہ نے جس طرح بھارتی طیاروں کو گرایا یہ کوئی معمولی بات نہیں، آج اغیار اور دوست کہنے پرمجبور ہیں کہ پاکستان نے بھارت پر برتری حاصل کرلی۔

پوری جنگ کی پلاننگ آرمی چیف نے کی

ان کا یہ بھی کہنا تھا کہ افواج نے تکنیکی طریقے سے جس طرح جنگ لڑی ماہرین کتابیں لکھیں گے۔ جنرل ساحر شمشاد مرزا اور آرمی چیف عاصم منیر کو سلام پیش کرتا ہوں، ایئر چیف ظہیر احمد بابر اور نیول چیف نوید اشرف کو بھی سلام پیش کرتا ہوں۔

انہوں نے مزید کہا کہ اس پوری جنگ کی پلاننگ آرمی چیف جنرل عاصم منیر نے کی، آرمی چیف نے انتہائی دلیری اور دانشمندی سے جنگ کی پلاننگ کی۔

آئی ایس پی آر نے مزید بتایا کہ وزیراعظم چند روز میں پاک فضائیہ اور پاک بحریہ کے افسران و جوانوں سے ملاقات کریں گے جب کہ وزیراعظم ایئر اور نیول بیسز کا بھی دورہ کریں گے۔