اسلام آباد:پاکستان نے سندھ طاس معاہدے کی معطلی پر باقاعدہ سفارتی ذرائع سے نوٹس دینے کا فیصلہ کر لیا ہے۔

ذرائع کے مطابق نوٹس نئی دہلی میں پاکستانی ہائی کمیشن کے ذریعے بھارتی حکام کے حوالے کیا جائے گا، بھارت سفارتی ذرائع سے ملنے والے نوٹس کا 15 دن میں جواب دینے کا پابند ہو گا۔

ذرائع نے بتایا کہ نوٹس میں بھارت سے سندھ طاس معاہدے کی یکطرفہ معطلی کی ٹھوس وجوہات طلب کی جائیں گی، جبکہ بھارت کے جواب کی روشنی میں پاکستان اپنا لائحہ عمل طے کرے گا۔

یہ بھی پڑھیں: بھارت کے سندھ طاس معاہدے کی معطلی پر فناشل ٹائمز کی اہم رپورٹ جاری

ذرائع کے مطابق اس حوالے سے خارجہ، آبی وسائل اور قانون کی وزارتوں نے ابتدائی ہوم ورک کر لیا ہے، جبکہ پاکستان قانونی کارروائی کی ضرورت پڑنے پر عالمی عدالت انصاف سے رجوع کرے گا، اس حوالے سے پاکستان دی ہیگ میں اپنے سفیر کے ذریعے عالمی عدالت میں کارروائی  کے لیے درخواست دے سکتا ہے۔

واضح رہے کہ بھارت کو سفارتی نوٹس بھیجنے کا فیصلہ اعلیٰ قومی قیادت کی سطح پر کیا گیا ہے۔