اسلام آباد: پاک بھارت کشیدگی پر ترکیہ نے پاکستان کی حمایت کا اعلان کردیا ہے۔

وزیراعظم شہباز شریف سے پاکستان میں ترکیہ کے سفیر نے ملاقات کی جس میں ترک سفیر نے خطے میں کشیدگی کم کرنے اور جنوبی ایشیاء میں امن و سلامتی برقرار رکھنے کے لیے تحمل سے کام لینے پر زور دیا۔

اس موقع پر وزیراعظم نے گفتگو کرتے ہوئے کہا کہ بھارت پاکستان کو پہلگام واقعے سے جوڑنے کی سازش کررہا ہے، مودی سرکار الزامات کا کوئی ثبوت دینے میں ناکام رہی۔

انہوں نے کہا کہ شفاف، غیرجانبدارانہ بین الاقوامی تحقیقات میں تعاون کریں گے، ترکیہ تحقیقات میں شامل ہو تو خیرمقدم کریں گے۔

شہباز شریف نے کہا کہ بھارتی اشتعال انگیزیوں کے باوجود ہمارا ردعمل ذمےدارانہ رہا، اقتصادی بحالی کے لیے پڑوس میں امن وسلامتی ضروری ہے۔

دوسری جانب ترک سفیر نے کہا کہ ہلگام واقعے کے بعد بھارت کی اشتعال انگیز کارروائیوں کے باوجود پاکستان کا ردعمل ذمے دارانہ رہا ہے اور پاکستان نے ہمیشہ ہر قسم کی دہشت گردی کی مذمت کی ہے۔

انکا مزید کہنا تھا کہ بھارت نے قابل اعتماد، شفاف اور غیر جانبدار بین الاقوامی تحقیقات کی پاکستان کی پیشکش کا جواب دینا ہے اردوان حکومت پاکستان کے مؤقف کے ساتھ ہیں۔

بعدازاں وزیراعظم نے پاکستان کی حمایت پر ترکیہ کے صدر اردوان سے تشکر کا اظہار بھی کیا۔