لاہور: مسلم لیگ ن کے قائد نواز شریف اور وزیر اعظم شہباز شریف کی ملاقات کی اندرونی کہانی سامنے آگئی ہے۔

وزیراعظم میاں شہباز شریف صدر مسلم لیگ ن میاں نواز شریف سے ملاقات کے لیے جاتی امراء پہنچے، جہاں شہباز شریف نے نواز شریف کو تفصیلی صورتحال سے آگاہ کیا۔

ملاقات میں ملکی مجموعی صورتحال میں تبادلہ خیال کیا گیا جب کہ وزیرِ اعظم شہباز شریف نے آپریشن بنیان المرصوص کی کامیابیوں سے بھی نواز شریف کو آگاہ کیا۔

اس موقع پر نواز شریف نے کہا کہ پاک بھارت جنگ میں ہماری بہادر مسلح افواج نے انتہائی پیشہ وارانہ مہارت اور بھرپور عزم سے سرزمین وطن کا دفاع کیا۔

صدر مسلم لیگ ن نے کہا کہ پاکستان کی پارلیمنٹ نے بھی نہایت مثبت اور توانا کردار ادا کیا ہے، قومی سلامتی کے لیے ہر قسم کی سیاسی تقسیم بھلا کر ایک آواز میں بولنا خوش آئند اقدام ہے۔

نواز شریف کہتے ہیں کہ عوامی نمائندوں نے 24 کروڑ عوام کے جذبات کی ترجمانی کرتے ہوئے اپنی بہادر مسلح افواج کا حوصلہ بڑھایا۔

انہوں نے مزید کہا کہ اس فتح پر ہم اللہ تعالیٰ کے شکر گزار ہیں، پاکستانی میڈیا کو بھی خراج تحسین پیش کرتے ہیں۔