کراچی: شہر قائد میں گرمی کی شدت کے ساتھ ہی کے الیکٹرک کی جانب سے اعلانیہ و غیر اعلانیہ لوڈشیڈنگ کا سلسلہ تیز ہوگیا ہے، جس سے شہری شدید مشکلات میں مبتلا ہو گئے ہیں۔

گزشتہ دس برس سے بجلی کی بندش سے مستثنیٰ علاقوں اردو بازار، رتن تلاؤ، پریڈی اسٹریٹ اور فریئر مارکیٹ میں اچانک 10 گھنٹے طویل لوڈشیڈنگ کا آغاز کر دیا گیا، جس پر علاقہ مکینوں نے شدید ردِعمل کا اظہار کیا ہے۔

علاقہ مکینوں کا کہنا ہے کہ گرمی اور حبس کے دوران طویل لوڈشیڈنگ نے ان کی زندگی کو مفلوج کر دیا ہے، بزرگ افراد، خواتین اور بچے خاص طور پر اذیت میں مبتلا ہیں، جبکہ کاروباری سرگرمیاں بھی شدید متاثر ہو رہی ہیں۔

مزید پڑھیں: کراچی کے صارفین کیلئے اچھی خبر؛ بجلی کی قیمت میں کمی کا امکان

مقامی شہریوں کے مطابق علاقے میں سو فیصد بلنگ کی جاتی رہی ہے اور گزشتہ ایک دہائی سے لوڈشیڈنگ کا سامنا نہیں ہوا، مگر اب بغیر کسی پیشگی اطلاع کے گھنٹوں بجلی بند کی جا رہی ہے۔

شہریوں کا یہ بھی کہنا ہے کہ کے الیکٹرک حکام سے شکایات کرنے پر کوئی سنوائی نہیں ہو رہی اور نہ ہی لوڈشیڈنگ کی باقاعدہ وجوہات سے آگاہ کیا جا رہا ہے، بجلی کی بندش کے ساتھ ساتھ پانی کا بحران بھی شدت اختیار کر گیا ہے، جس سے مکین دہری مشکلات کا شکار ہیں۔

متاثرہ علاقوں کے رہائشیوں نے کے الیکٹرک اور اعلیٰ حکام سے مطالبہ کیا ہے کہ وہ فوری طور پر اس غیر اعلانیہ لوڈشیڈنگ کا نوٹس لیں اور بجلی کی فراہمی کو بحال کیا جائے تاکہ روزمرہ زندگی معمول پر آسکے۔