تہران: وزیراعظم شہباز شریف نے ایرانی صدر کے ہمراہ مشترکہ پریس کانفرنس کرتے ہوئے کہا کہ ایران کو ہم اپنا دوسرا گھر سمجھتے ہیں، دورہ کرکے دلی مسرت ہوئی۔

وزیراعظم محمد شہباز شریف اور ایرانی صدر ڈاکٹر مسعود پزشکیان نے تہران میں مشترکہ پریس کانفرنس سے خطاب کیا جس میں دونوں رہنماؤں نے پاک ایران دوطرفہ تعلقات، خطے کی صورت حال اور باہمی تعاون کے فروغ پر تفصیلی گفتگو کی۔

ایرانی صدر کا اظہار خیال

ایرانی صدر ڈاکٹر مسعود پزشکیان نے کہا کہ پاکستان اور ایران کے درمیان دہائیوں پر محیط گہرے ثقافتی اور تاریخی روابط موجود ہیں۔ دونوں ممالک کی پالیسیوں میں مماثلت پائی جاتی ہے، خصوصاً او آئی سی کے پلیٹ فارم پر دونوں کا مؤقف یکساں ہے۔

انہوں نے بتایا کہ سیاست، معیشت اور بین الاقوامی امور سمیت مختلف شعبوں میں تعاون پر بات چیت ہوئی ہے۔ سرحدی علاقوں میں انسداد دہشت گردی کے لیے قریبی تعاون وقت کی اہم ضرورت ہے جب کہ پاکستان اور بھارت کے درمیان جنگ بندی کا خیر مقدم کرتے ہیں۔

ڈاکٹر مسعود پزشکیان کا کہنا تھا کہ خطے کی ترقی اور خوشحالی امن کے بغیر ممکن نہیں اور ایران و پاکستان فلسطینی کاز کی بھرپور حمایت جاری رکھیں گے۔ فلسطین میں جاری نسل کشی پر عالمی برادری کی خاموشی سوالیہ نشان ہے۔

ایرانی صدر نے وزیراعظم شہباز شریف کے دورہ ایران کو خوش آئند قرار دیتے ہوئے اس کے مثبت نتائج کی امید ظاہر کی۔

شہباز شریف کا خطاب

وزیراعظم شہباز شریف نے ایرانی قیادت اور عوام کا شکریہ ادا کرتے ہوئے کہا کہ ایران کو ہم اپنا دوسرا گھر سمجھتے ہیں اور برادر ملک کا دورہ کرنا باعث مسرت ہے۔

انہوں نے کہا کہ ایرانی صدر کے ساتھ ملاقات نہایت تعمیری اور مفید رہی جس میں دوطرفہ تعلقات کے تمام پہلوؤں پر تفصیل سے گفتگو ہوئی۔

وزیراعظم نے بتایا کہ ملاقات میں تجارت، سرمایہ کاری اور دیگر شعبوں میں تعاون کو فروغ دینے پر اتفاق ہوا۔ ایران اور پاکستان کے تاریخی، مذہبی اور ثقافتی رشتے بہت مضبوط ہیں۔

وزیراعظم نے ایرانی صدر کی جانب سے خطے میں کشیدگی پر تشویش کے اظہار کا بھی شکریہ ادا کیا جب کہ ان کا کہنا تھا کہ ایرانی وزیر خارجہ عباس عراقچی بہترین سفارتکار ہیں۔

انہوں نے پاکستان کی بہادر افواج کی دلیرانہ کارروائیوں کا ذکر کرتے ہوئے کہا کہ ہم نے اپنی عوام کی طاقت سے کامیابی حاصل کی۔ پاکستان ایک پُرامن ملک ہے جو خطے میں امن و استحکام کا خواہاں ہے اور اس مقصد کے لیے ہمیشہ بات چیت کو ترجیح دیتا ہے۔

انہوں نے مزید کہا کہ پاکستان پانی کے مسئلے اور انسداد دہشت گردی کے حوالے سے ایران سے بات چیت کے لیے تیار ہے تاہم اگر کسی قسم کی جارحیت کی گئی تو اس کا بھرپور جواب دیا جائے گا۔

وزیراعظم نے مسئلہ کشمیر کو اجاگر کرتے ہوئے کہا کہ پاکستان تمام تنازعات کا حل مذاکرات کے ذریعے چاہتا ہے۔ غزہ کی صورتحال پر اظہار تشویش کرتے ہوئے وزیراعظم نے بتایا کہ اب تک 50 ہزار سے زائد افراد شہید ہو چکے ہیں اور وقت کا تقاضا ہے کہ عالمی برادری فوری اور مستقل جنگ بندی کو یقینی بنائے۔

وزیراعظم نے کہا کہ پاکستان اپنے فلسطینی بھائیوں کے ساتھ کھڑا ہے اور پرامن مقاصد کے لیے ایران کے سول جوہری پروگرام کی حمایت کرتا ہے۔

وزیر اعظم ایران پہنچ گئے

یاد رہے کہ وزیرِ اعظم محمد شہباز شریف ترکیہ کے بعد اپنے دو روزہ سرکاری دورے پر ایران کے دارالحکومت تہران پہنچے تھے  جب کہ ان کے ہمراہ ایک اعلیٰ سطحی وفد بھی موجود ہے۔

اعلیٰ سطحی وفد میں نائب وزیرِ اعظم و وزیرِ خارجہ محمد اسحاق ڈار، فیلڈ مارشل سید عاصم منیر، وفاقی وزیرِ داخلہ سید محسن رضا نقوی، وفاقی وزیرِ اطلاعات عطااللہ تارڑ اور معاونِ خصوصی برائے خارجہ امور سید طارق فاطمی شامل ہیں۔

تہران کے مہرآباد ایئرپورٹ پہنچنے پر ایرانی وزیرِ داخلہ اسکندر مومنی، ایران میں پاکستان کے سفیر رضا امیری مقدم اور پاکستان میں تعینات ایرانی سفیر مدثر ٹیپو نے وزیرِ اعظم اور پاکستانی وفد کا استقبال کیا۔

اس موقع پر ایرانی فوج کے چاک و چوبند دستے نے وزیرِ اعظم شہباز شریف کو سلامی پیش کی۔