ترجمان دفتر خارجہ شفقت علی خان نے کہا کہ پاکستان نے دربار صاحب امرتسر پر حملے کا بھارتی الزام مسترد کر دیا۔

 بھارتی فوج کے سینئر افسر کے ریمارکس سے متعلق میڈیا کے سوالات پر ترجمان دفتر خارجہ نے ردعمل دیتے ہوئے کہا کہ ہم اس الزام کو قطعی طور پر مسترد کرتے ہیں کہ پاکستان نے، گولڈن ٹیمپل کو نشانہ بنانے کی کوشش کی۔

ترجمان دفتر خارجہ کا کہنا ہے کہ پاکستان تمام مذہبی عبادت گاہوں کا بے حد احترام  کرتا ہے، پاکستان گولڈن ٹیمپل جیست کسی مقدس مقام کو نشانہ بنانے کا سوچ بھی نہیں سکتا۔

انہوں یہ بھی کہا کہ حقیقت تو یہ ہے کہ بھارت نے ہی 6 اور 7 مئی کی درمیانی شب پاکستان میں مختلف مذہبی مقامات کو نشانہ بنایا، بھارتی الزامات اس ناقابل قبول اقدام سے توجہ ہٹانے کی کوشش ہیں۔

ترجمان دفتر خارجہ کا کہنا تھا کہ پاکستان سکھ مذہب کے کئی مقدس مقامات کا فخر سے نگہبان ہے، ہر سال دنیا بھر سے ہزاروں سکھ یاتری پاکستان کا رخ کرتے ہیں۔

یہ بھی پڑھیں: جنگی محاذ پر شکست کے بعد بھارت کا نیا پراپیگنڈہ شروع

ترجمان دفتر خارجہ نے مزید یہ بھی کہا کہ پاکستان گوردوارہ صاحب کرتارپور تک بغیر ویزہ رسائی فراہم کرتا ہے، پاکستان کی جانب سے گولڈن ٹیمپل کو نشانہ بنانے کا کوئی بھی دعویٰ مکمل طور پر بے بنیاد اور غلط ہے۔