بلوچستان کے علاقے خضدار میں بھارتی سرپرستی میں دہشتگردوں نے گھناؤنا اور بزدلانہ حملہ کیا جس کے نتیجے میں 3 بچوں سمیت 5 افراد شہید ہوگئے۔

پاک فوج کے تعلقات عامہ(آئی ایس پی آر) کے مطابق بلوچستان کے علاقے خضدار میں آج ایک بار پھر بھارتی منصوبہ بندی اور سرپرستی میں ہولناک حملہ ہوا، دہشتگردوں نے اسکول جانے والے معصوم بچوں کی بس کو نشانہ بنایا۔

یہ بھی پڑھیں: بلوچستان، دہشت گردوں کا سیکیورٹی فورسز کی چیک پوسٹ پرحملہ

آئی ایس پی آر کے مطابق بھارتی حمائیت یافتہ دہشت گرد میدان جنگ میں بری طرح ناکام ہونے کے بعد بلوچستان اور خیبرپختونخوا میں گھناؤنی اور بزدلانہ کارروائیوں کررہے ہیں، جس کے دوران دہشت گردی اور بدامنی پھیلائی جارہی ہے، دہشت گردوں نے خضدار میں اسکول جانے والے معصوم بچوں کی بس کو نشانہ بنایا، ابتدائی اطلاعات کے مطابق تین بچوں سمیت پانچ افراد شہید، کئی بچے زخمی ہوئے ہیں،

آپریشن بنیان مرصوص میں ناکامی اور فوج اور قانون نافذ کرنے والے اداروں کے ہاتھوں بری طرح شکست کھانے کے بعد بھارتی دہشت گرد پراکسیز پاکستان میں معصوم بچوں اور شہریوں جیسے آسان اہداف کے دہشت گردی کی کارروائیوں میں نشانہ بنارہی ہیں۔

بھارتی حکومت کی طرف سے ریاستی پالیسی کے طور پر دہشت گردی کا استعمال نفرت انگیز، اخلاقی پستی اور بنیادی انسانی اصولوں کو نظر انداز کرنے کی واضح مثال ہے، ترجمان نے اس عزم کا اعادہ کیا کہ اس بزدلانہ بھارتی اسپانسرڈ حملے کے منصوبہ سازوں، سہولت کاروں اور ذمہ داروں کو پکڑ کر انصاف کے کٹہرے میں لایا جائے گا اور بھارت کا مکروہ چہرہ پوری دنیا کے سامنے بے نقاب کیا جائے گا، پاکستان کی مسلح افواج بہادر پاکستانی قوم کی حمایت کے ساتھ، پاکستان سے بھارتی اسپانسرڈ دہشت گردی کو جڑ سے اکھاڑ پھینکنے کے لئے متحد ہیں۔