راولپنڈی: بھارت نے گزشتہ شب ایک بار پھر جارحیت کی کوشش کرتے ہوئے پاکستانی فضائی حدود میں ڈرونز کے ذریعے دراندازی کی، جس پر پاکستانی افواج نے فوری طور پر ردِعمل دیتے ہوئے متعدد بھارتی ڈرونز کو مار گرایا۔

ڈائریکٹر جنرل (ڈی جی) انٹر سروسز پبلک ریلیشن (آئی ایس پی آر) لیفٹیننٹ جنرل احمد شریف چوہدری نے نیوز بریفنگ دیتے ہوئے کہا کہ7 اور 8 مئی کی شب بھارت نے ایک بار پھر جارحیت کی کوشش کی، تاہم پاکستانی مسلح افواج پوری طرح چوکس ہیں۔

انہوں نے بتایا کہ بھارت نے مختلف شہروں میں ڈرونز کے ذریعے دراندازی کی کوشش کی، لاہور کے قریب ایک ڈرون حملے میں پاک فوج کے 4 جوان زخمی ہوئے جبکہ میانوسندھ میں بھارتی ڈرون کی کارروائی میں 1 شہری شہید اور 1 زخمی ہوا۔

ڈی جی آئی ایس پی آر کے مطابق لائن آف کنٹرول پر دشمن کو بھاری نقصان پہنچایا گیا اور بھارت کے 12 ڈرونز کو مختلف مقامات پر مار گرایا گیا، عالمی برادری بھارت کی اشتعال انگیزی کی گواہ ہے۔

 انہوں نے اس معاملے کو انتہائی سنگین قرار دیتے ہوئے کہا کہ بھارت مساجد اور شہری آبادی پر حملوں کا مرتکب ہوا ہے۔

ڈی جی آئی ایس پی آر نے بتایا کہ بھارت نے ایک بار پھر پاکستان کی فضائی حدود کی خلاف ورزی کی ہے اور مختلف شہروں میں مارگرائے گئے بھارتی ڈرونز کا ملبہ اکٹھا کیا جا رہا ہے۔

ترجمان پاک فوج نے مزید کہا کہ پاکستان کے مختلف علاقوں لاہور، گوجرانوالہ، بہاولپور، کراچی، چکوال اور اٹک میں بھارتی ڈرونز کو مارگرایا گیا جبکہ راولپنڈی، چھور اور میانوسندھ میں بھی بھارتی ڈرونز کو ناکارہ بنایا گیا۔