مقبوضہ کشمیر میں پہلگام فالس فلیگ آپریشن کے بعد روزمرہ کے جعلی مقابلوں اور ماورائے عدالت اموات میں اضافہ ہوگیا ہے۔

کلگام کے علاقے میں بھارتی فورسز نے ایک ویڈیو جاری کی ہے جس میں کشمیری نوجوان امتیاز احمد ماگرے کو دریا میں چھلانگ لگاتے ہوئے دکھایا گیا ہے۔ بھارتی میڈیا نے اسے دہشت گرد قرار دے کر پراپیگنڈہ مہم شروع کر دی ہے، تاہم حقیقت اس کے برعکس ہے۔

ماضی کی طرح بھارتی میڈیا ایک بار پھر جھوٹی خبریں پھیلا کر دنیا کو گمراہ کرنے کی کوشش کر رہا ہے۔ قابض افواج جعلی مقابلوں میں معصوم کشمیری نوجوانوں کو شہید کر رہی ہیں جبکہ عالمی قوانین کی مسلسل خلاف ورزیوں میں ملوث ہیں۔

مقبوضہ وادی میں روزانہ کی بنیاد پر غیر انسانی سرچ آپریشنز اور رات گئے گھروں پر دھاوا بول کر کشمیری عوام کو خوف و ہراس میں مبتلا کیا جا رہا ہے۔ ایمنسٹی انٹرنیشنل، ہیومن رائٹس واچ، اور اقوام متحدہ سمیت کئی عالمی ادارے بھارتی افواج کے مظالم پر اظہار تشویش کر چکے ہیں۔

اعداد و شمار کے مطابق اگست 2019 سے اب تک 995 کشمیری بھارتی مظالم کا نشانہ بن چکے ہیں، جبکہ 2465 افراد زخمی ہوئے۔ مجموعی طور پر 96,432 کشمیری اب تک شہید ہو چکے ہیں۔ صرف اپریل 2025 میں 11 کشمیریوں کو ماورائے عدالت قتل کیا گیا۔

مقبوضہ کشمیر بھارت کی ریاستی دہشت گردی کی تجربہ گاہ بن چکا ہے جبکہ مغربی میڈیا اور عالمی اداروں کی خاموشی نے بھارت کو کھلی چھوٹ دے دی ہے۔ مقبوضہ خطہ دنیا کی سب سے بڑی جیل کی شکل اختیار کر چکا ہے جہاں کشمیریوں کے جان و مال، گھروں اور بنیادی انسانی حقوق کو مسلسل پامال کیا جا رہا ہے۔