اسلام آباد: ڈپٹی وزیراعظم اسحاق ڈار اور ڈی جی آئی ایس پی آر لیفٹیننٹ جنرل احمد شریف نے مشترکہ پریس بریفنگ میں بھارت کی جانب سے جاری جھوٹے الزامات، فضائی اور ڈرون حملوں اور ان کے جواب میں پاکستان کی مؤثر حکمت عملی پر روشنی ڈالی۔

ڈی جی آئی ایس پی آر لیفٹیننٹ جنرل احمد شریف نے کہا کہ پاکستان بھارت کی جانب سے آنے والی ہر سرگرمی کو باریک بینی سے مانیٹر کر رہا ہے۔ بھارتی فوج نے امرتسر میں خود اپنے جنرل ایریا کو نشانہ بنایا اور پروپیگنڈا کیا کہ یہ حملہ پاکستان کی جانب سے کیا گیا۔

ترجمان پاک فوج کے مطابق بھارت نے مجموعی طور پر چار پروجیکٹائل فائر کیے جن میں سے ایک پاکستان کے علاقے ڈنگہ میں گرا جب کہ تین اپنے ہی علاقے میں گرا کر الزام پاکستان پر لگا دیا۔ ڈنگہ میں گرنے والے پروجیکٹائل کا فرانزک معائنہ کیا جا رہا ہے تاکہ حقائق کو بے نقاب کیا جاسکے۔

ڈی جی آئی ایس پی آر نے کہا کہ بھارت نے پروپیگنڈا کیا کہ پاکستان نے 15 مقامات پر حملہ کیا، مگر 21 ویں صدی میں ہر چیز مانیٹر ہوتی ہے اور اب ایسی جھوٹی کہانیوں کی کوئی گنجائش نہیں۔ انہوں نے طنزیہ انداز میں کہا کہ بھارت کو اپنے فلمی سنیما سے نکل کر حقیقت کی دنیا میں آنا چاہیے۔

لیفٹیننٹ جنرل احمد شریف نے انکشاف کیا کہ پاکستان نے بھارت کے 29 ڈرونز مار گرائے جن میں سے ایک حملے میں پاک فوج کے چار جوان زخمی بھی ہوئے۔ بھارت اگر ڈرامہ ہی کرنا چاہتا تو کم از کم کھیتوں میں رکھے پرزوں کے ساتھ آگ ہی لگا دیتا۔

ڈی جی آئی ایس پی آر کا کہنا تھا کہ جب پاکستان حملہ کرے گا تو دنیا خود دیکھے گی، کسی بھارتی میڈیا کی ضرورت نہیں رہے گی۔ پاکستان نے 2019 میں بھارتی جارحیت کا جواب چائے سے دیا تھا اس بار چائے وہاں بھجوا دی گئی ہے۔

دوسری جانب ڈپٹی وزیراعظم اسحاق ڈار نے کہا کہ بھارت نے بزدلانہ حملہ کیا اور پاکستان کی خودمختاری اور عالمی قوانین کی خلاف ورزی کی۔ بھارت پاکستان میں سویلین آبادی کو نشانہ بنا رہا ہے جب کہ پاکستان بھارتی پنجاب میں کسی شہری کو نشانہ بنانے کی تردید کرتا ہے۔

یہ بھی پڑھیں: بھارت نے آغاز کردیا ہے، اب وقت جگہ اور ٹارگٹ کا تعین ہم کریں گے

یہ بھی پڑھیں: بھارت کی دوبارہ جارحیت کی کوشش، پاکستانی افواج کا بھرپور ردِعمل

اسحاق ڈار نے کہا کہ پاکستان اپنے شہریوں کے تحفظ کے لیے ہر ممکن اقدام کرے گا اور بھارتی جھوٹے دعوؤں کے باوجود مؤثر دفاع جاری رکھے گا جب کہ پاک فضائیہ نے بھارت کے 75 سے 80 طیاروں کا مقابلہ کرتے ہوئے پانچ جہاز مار گرائے۔

ڈپٹی وزیراعظم نے واضح کیا کہ پاکستان پر حملوں کے بعد میزائل اور ڈرونز کا جواب دینا پاکستان کا حق ہے اور مسلح افواج، فضائیہ اور نیوی مکمل الرٹ ہیں۔ اگر بھارت نے کوئی “ایڈونچر” کیا تو اسے منہ کی کھانی پڑے گی۔