راولپنڈی:9 مئی 2025 کو ڈی جی آئی ایس پی آر نے جوائنٹ پریس کانفرنس کے دوران بین الاقوامی میڈیا کے سامنے بھارتی جھوٹ کا پردہ چاک کیا اور بھارت کی فضائی جارحیت کے حوالے سے ناقابلِ تردید شواہد پیش کیے۔

6 اور 7 مئی 2025 کی رات پاک فضائیہ اور بھارتی طیاروں کے درمیان پاک-بھارت تاریخ کی ایک طویل فضائی جنگ ہوئی، جو ایک گھنٹے سے زیادہ جاری رہی، اس دوران پاک فضائیہ کے شاہینوں نے 5 بھارتی طیارے مار گرائے، ان میں 3 جدید رافیل طیارے، ایک مگ 29 اور ایک SU-30 شامل تھے۔

بھارت نے روایتی ہٹ دھرمی کا مظاہرہ کرتے ہوئے طیارے گرنے کی خبروں کو مسترد کیا، تاہم بھارتی میڈیا چینلز نے طیارے گرنے کی تصدیق کی، جسے بعد میں بھارتی حکومت نے ہٹوا دیا۔

ڈی جی آئی ایس پی آر اور سینئر ائیر فورس آفیسر نے مشترکہ پریس کانفرنس میں بھارتی رافیل طیارے گرنے کے شواہد پیش کیے، جن میں طیاروں کے نمبرز اور تباہ ہونے کی لوکیشنز شامل تھیں۔

ڈی جی آئی ایس پی آر نے مزید کہا کہ بھارت کے مطابق ہمارا کوئی طیارہ نہیں گرا لیکن بھارتی میڈیا نے خود طیارہ گرنے کی تصدیق کی، ہم 21ویں صدی میں رہ رہے ہیں، نہ کہ 18ویں صدی میں، ہر چیز اپنا نشان چھوڑ جاتی ہے۔

بھارتی صحافیوں نے بھی اس فضائی جنگ کے شواہد دیے، تاہم بی بی سی کے نمائندے نے پامپور اور رام بن کے علاقوں سے طیارے گرنے کی آوازوں کی تصدیق کی۔

اس کے علاوہ بھارتی صحافی پراوین سواہنے اور کرن تھاپر نے بھی جموں و کشمیر میں بھارتی فضائیہ کے طیاروں کی تباہی کے شواہد پیش کیے۔

پاک فضائیہ نے ان دفاعی کارروائیوں کو پاکستان کی خودمختاری کے تحفظ کے لیے انجام دیا، جس پر پورا ملک فخر کرتا ہے۔