جنیوا: عالمی ادارہ صحت (ڈبلیو ایچ او) نے پاکستان میں آنکھوں کی بیماری ’’ٹریکوما‘‘ کے خاتمے پر وفاقی وزیر صحت مصطفیٰ کمال کو عالمی سطح کا اعلیٰ اعزاز سے نواز دیا۔

جنیوا میں جاری ورلڈ ہیلتھ اسمبلی کے دوران ڈبلیو ایچ او نے ٹریکوما کے خاتمے پر پاکستان کو یہ اعزاز پیش کیا۔

ترجمان وزارت صحت کے مطابق ڈبلیو ایچ او کے ڈائریکٹر جنرل نے وزیر صحت مصطفیٰ کمال کو ایک اعزازی سرٹیفکیٹ پیش کیا جسے پاکستان کے لیے ایک ’’عظیم سنگِ میل‘‘ قرار دیا گیا ہے۔

اس موقع پر وزیر صحت مصطفیٰ کمال کا کہنا تھا کہ یہ کامیابی پاکستان کی عوامی صحت کے شعبے میں ایک بڑی پیش رفت ہے۔

اُن کا کہنا تھا کہ ٹریکوما ایک خطرناک بیماری ہے جو بیکٹیریا کے باعث آنکھوں میں انفیکشن پیدا کرتی ہے اور اگر بروقت علاج نہ ہو تو یہ مستقل نابینائی کا سبب بھی بن سکتی ہے۔

وزیر صحت نے اس عزم کا اظہار بھی کیا کہ جس طرح ٹریکوما کے خاتمے میں کامیابی حاصل کی گئی ہے اسی طرح پولیو کے مکمل خاتمے کے لیے بھی بھرپور اقدامات کیے جائیں گے۔