کراچی: نادرن بائی پاس پر قائم مویشی دوست منڈی 2025 اپنے 26 ویں روز میں داخل ہوگئی ہے، جہاں 1100 ایکڑ رقبے پر قربانی کے ہزاروں جانوروں کی موجودگی نے میلے کا سماں پیدا کررکھا ہے۔

کراچی کی مویشی دوست منڈی میں ملک بھر سے خصوصاً پنجاب، سندھ، خیبرپختونخوا، بلوچستان اور کشمیر سے بیل، بچھڑے، اونٹ، بکروں اور دیگر جانوروں کی آمد کا سلسلہ بدستور جاری ہے۔

منڈی میں سبی، ساہیوال، چولستانی، آسٹریلین اور سندھی نسل کے جانور شہریوں کی توجہ کا مرکز بنے ہوئے ہیں جب کہ نقش و نگار والے اونٹ، ٹاپری، سندھی اور کاموری نسل کے بکروں کی مانگ میں نمایاں اضافہ دیکھنے میں آیا ہے۔

وی وی آئی پی، وی آئی پی اور سفائر بلاکس میں موجود بھاری بھرکم جانور منڈی کی زینت بنے ہوئے ہیں۔

انتظامیہ کے مطابق منڈی میں بیوپاریوں اور شہریوں کی سہولت کے لیے متعد سہولیات فراہم کی گئی ہیں جن میں ہر جانور کے لیے 30 لیٹر مفت پانی، آدھی پارکنگ فیس، 24 گھنٹے بجلی کی فراہمی، موبائل اے ٹی ایم اور فوڈ اسٹریٹ شامل ہیں۔

ایڈمنسٹریٹر شہاب علی نے بتایا کہ شہری رات بھر پرامن ماحول میں نہ صرف قربانی کے جانوروں کا معائنہ کر رہے ہیں بلکہ فوڈ اسٹریٹ سے بھی لطف اندوز ہو رہے ہیں۔

مارشلنگ ایریا میں جانوروں سے لدی ہیوی گاڑیوں کی آمد و رفت دن رات جاری ہے۔ ایڈمنسٹریٹر بلاک کے سامنے موبائل بینک اور اے ٹی ایم کی سہولت بھی فراہم کی گئی ہے تاکہ بیوپاری اور خریدار مالی امور میں آسانی سے لین دین کرسکیں۔

دوسری جانب مویشی منڈی کی پارکنگ ایریا سے متعلق سوشل میڈیا پر وائرل ہونے والی ویڈیوز پر پارکنگ کنٹریکٹر عدنان نے وضاحت دیتے ہوئے کہا کہ سوشل میڈیا پر پھیلائی گئی من گھڑت ویڈیوز کا مقصد شہریوں میں خوف و ہراس پھیلانا ہے۔

ان کا کہنا تھا کہ ہم نے انٹری پوائنٹس پر والینٹیئرز تعینات کیے ہیں جو پارکنگ پاسز کی جانچ کرتے ہیں تاہم بعض افراد بلاوجہ ویڈیوز بناتے اور عملے سے الجھتے ہیں۔

انہوں نے بتایا کہ اس سال پارکنگ سسٹم کو مکمل طور پر کمپیوٹرائزڈ کردیا گیا ہے تاکہ جعلی کارڈز کی فوری شناخت ممکن ہو۔ اب تک کئی جعلی کارڈز پکڑے جا چکے ہیں۔

عدنان کا کہنا تھا کہ مویشی منڈی میں آنے والے شہری ذمہ داری کا مظاہرہ کرتے ہوئے درست کارڈز دکھا کر داخل ہو رہے ہیں جب کہ شرپسند عناصر جان بوجھ کر غلط بیانی سے منڈی کے ماحول کو خراب کرنے کی کوشش کر رہے ہیں۔

انہوں نے کہا کہ ایسے عناصر نہ صرف اس شہر بلکہ اُن غریب بیوپاریوں کے بھی دشمن ہیں جو دور دراز سے اپنے جانور شہریوں تک پہنچانے کے لیے آئے ہیں تاکہ ہر شہری کو قربانی کے لیے معیاری جانور اس کی دہلیز پر مہیا ہوسکے۔

واضح رہے کہ منڈی میں جانوروں کی آمد کا سلسلہ عیدالاضحی تک جاری رہے گا۔