پاکستان نے بھارتی جارحیت کے جواب میں ’’بُنْيَانٌ مَّرْصُوْصٌ‘‘ آپریشن کا آغاز کرتے ہوئے بھارتی ایئر بیسز ادھم پور اور پٹھان کوٹ سمیت متعدد ایئرفیلڈز تباہ کر دیں جب کہ بیاس میں واقع براہموس میزائل اسٹوریج سائٹ کو بھی مکمل طور پر تباہ کردیا گیا ہے۔

بھارت کی حالیہ جارحیت کے بعد پاکستان نے مؤثر اور بھرپور جوابی کارروائی کا آغاز کرتے ہوئے “آپریشن بُنْيَانٌ مَّرْصُوْصٌ” (آہنی دیوار) کا آغاز کردیا۔

اس آپریشن کے دوران بھارتی ایئر بیسز ادھم پور اور پٹھان کوٹ سمیت متعدد ایئرفیلڈز تباہ کر دی گئی ہیں جبکہ بیاس میں واقع براہموس میزائل اسٹوریج سائٹ کو مکمل طور پر تباہ کردیا گیا۔

یہ کارروائیاں منظم دفاعی حکمتِ عملی کے تحت کی گئیں جن کا مقصد پاکستان کی خودمختاری اور قومی سلامتی کا تحفظ ہے۔ پاک افواج کی جانب سے بھارت میں متعدد اہم اہداف کو کامیابی سے نشانہ بنایا گیا ہے۔

پاکستان پر حملے کرنے والا میزائل اسٹوریج تباہ

بیاس میں وہ میزائل اسٹوریج تباہ کیا گیا جہاں سے پاکستان پر حملے کیے گئے تھے جب کہ ادھم پور اور پٹھان کوٹ ایئر بیسز پر میزائل حملے کرکے انہیں مکمل طور پر غیر فعال بنا دیا گیا۔

اس کے علاوہ اڑی کے مقام پر بھارتی فوج کا سپلائی ڈپو اور جی ٹاپ میں بریگیڈ ہیڈکوارٹر کو بھی نشانہ بنایا گیا جسے بھاری نقصان پہنچا ہے۔

بھارت پر سائبر حملے

سائبر محاذ پر بھی زبردست پیش قدمی کرتے ہوئے متعدد بھارتی سرکاری اور نجی ویب سائٹس، ڈیٹا بیسز اور مواصلاتی نظام کو ہیک کرلیا ہے۔

پاکستانی سائبر وار ٹیم نے گزشتہ 24 گھنٹوں کے دوران درجنوں بھارتی ویب سائٹس کو ہیک کیا جس کے نتیجے میں بھارت کا تقریباً 70 فیصد پاور گرڈ ناکارہ ہوگیا اور ملک بھر میں بجلی کی سپلائی متاثر ہوگئی ہے۔

ہیک کی گئی ویب سائٹس میں بھارتی آسام رائفل،  ڈیپارٹمنٹ آف اٹامک انرجی پورٹل اور انڈین ڈیفنس پروڈکشن کے علاوہ دیگر شامل ہیں۔

انڈین ڈیفنس پروڈکشن ویب سائٹ کا حساس ڈیٹا ڈارک ویب پر فار سیل کردیا گیا، ان بھارتی ویب سائٹس پر انڈین دہشت گردی کے ثبوت اور بھارت دہشت گردی کی آماجگاہ ہے لکھا جاچکا ہے۔

بھارت کے انفارمیشن ٹیکنالوجی کی دنیا میں جدت کے بلند و بانگ دعوے کھوکھلے ثابت ہوئے ہیں۔

فتح-1 میزائل سسٹم نے بھارتی نام نہاد دفاعی نظام کو زمین بوس کردیا

پاکستانی فتح 1میزائل سسٹم کے ذریعے متعدد بھارتی اہداف کو نشانہ بناکر تباہ کردیا گیا ہے۔

پاکستانی فتح 1 میزائل سسٹم سے بھارتی اہداف کو نشانہ بنانے کی ایک اور ویڈیو لانچ سائٹ سے منظر عام پر آگئی جب کہ حملے سے دشمن کے متعدد ٹھکانے تباہ اور بھاری نقصان کی اطلاع ہے۔

کشمیری مسلمانوں کے لئے دہشت کی علامت راج کمار مارا گیا

راجوڑی میں افواج پاکستان نے کامیاب کارروائی کرتے ہوئے دہشت گردوں کا سہولت کار اور بھارتی حکومت کی پشت پناہی میں ایڈیشنل ڈی سی راج کمار تھاپا مارا گیا۔

راج کمار تھاپا کا حکومتی اعلیٰ عہدے کی آڑ میں دہشت گردوں کے ساتھ ملاپ تھا اور وہ کشمیری مسلمانوں کے لئے دہشت کی علامت سمجھا جاتا تھا جو زیادہ تر اعلیٰ فوجی بریفنگز میں بھی شامل ہوتا تھا۔

خیال رہے کہ یہ کارروائی بھارت کے جنگی جنون کے خلاف ایک واضح اور دو ٹوک پیغام ہے کہ پاکستان کسی بھی جارحیت کا منہ توڑ جواب دینے کی بھرپور صلاحیت رکھتا ہے اور اپنی قومی سالمیت پر کوئی سمجھوتہ نہیں کرے گا۔

آپریشن “بُنْيَانٌ مَّرْصُوْصٌ” اس وقت بھی جاری ہے اور مزید اہداف کو کامیابی سے نشانہ بنایا جارہا ہے۔