کراچی: ڈی جی آئی ایس پی آر لیفٹننٹ جنرل احمد شریف نے جناح یونیورسٹی کراچی کا دورہ کیا جس دوران طالبات سے ’’آپریشن بنیان مرصوص‘‘ پر تفصیلی گفتگو ہوئی۔

ڈی جی آئی ایس پی آر نے کراچی میں واقع جناح یونیورسٹی برائے خواتین کا دورہ کیا، جہاں ان کا پُرجوش استقبال کیا گیا۔ یونیورسٹی کی طالبات اور انتظامیہ نے ان کے اعزاز میں خصوصی تقریب کا انعقاد کیا اور پاک افواج کو خراجِ تحسین پیش کیا۔

طالبات سے تاریخی آپریشن پر مکالمہ

دورے کے دوران لیفٹننٹ جنرل احمد شریف نے طالبات سے خطاب کرتے ہوئے ’’آپریشن بنیان مرصوص‘‘ کی تفصیلات سے آگاہ کیا۔

ان کا کہنا تھا کہ پاک افواج نے دشمن کے ناپاک عزائم کو مکمل طور پر ناکام بنایا اور اس آپریشن میں عوام، بالخصوص نوجوان طلباء و طالبات کا کردار قابلِ تحسین رہا۔

ڈی جی آئی ایس پی آر نے کہا کہ بھارتی اسٹریٹجک مفروضے ہمیشہ کے لیے زمین بوس کردیے گئے اور پاکستانی قوم نے ثابت کیا کہ اتحاد، ایثار اور حب الوطنی کے جذبے سے ہر چیلنج کا مقابلہ ممکن ہے۔

کشمیر اور بلوچستان پر دو ٹوک مؤقف

لیفٹننٹ جنرل احمد شریف نے کہا ’’کوئی شک نہیں کہ کشمیر پاکستان کی شہ رگ ہے‘‘ اور بلوچستان کی عوام مذہب، ثقافت اور روایات کے لازوال رشتوں سے پاکستان سے جڑی ہوئی ہے۔

انہوں نے واضح کیا کہ چند مٹھی بھر دشمن ایجنٹ بلوچستان کے خالص پاکستانی رشتے کو نقصان نہیں پہنچا سکتے۔

طالبات کا جوش و جذبہ اور اظہارِ یکجہتی

تقریب کے اختتام پر طالبات نے پاک فوج کی قربانیوں کو سراہتے ہوئے کہا ’’ہم پاک افواج سے ہیں اور پاک افواج عوام سے ہیں‘‘۔

طالبات نے اس عزم کا اظہار کیا کہ ملک کی سلامتی اور ترقی کے لیے وہ ہر ممکن کردار ادا کرتے رہیں گی۔ طالبات نے اس طرح کے مزید معلوماتی اور قومی شعور بیدار کرنے والے سیشنز کے انعقاد کی بھی خواہش ظاہر کی۔

یونیورسٹی انتظامیہ نے ڈی جی آئی ایس پی آر کی آمد کو باعثِ فخر قرار دیتے ہوئے کہا کہ ایسے دورے نوجوان نسل کے حوصلے بلند کرنے اور دشمن کے پروپیگنڈے کو شکست دینے میں اہم کردار ادا کرتے ہیں۔