کراچی کے مختلف علاقوں میں رات گئے ایک بار پھر زلزلے کے جھٹکے محسوس کیے گئے۔

زلزلہ پیما مرکز کے مطابق شہر میں محسوس کیے گئے زلزلے کی شدت ریکٹر اسکیل پر 3.2 ریکارڈ کی گئی، زلزلے کی گہرائی 12 کلومیٹر بتائی گئی ہے جبکہ اس کا مرکز گڈاپ ٹاؤن کے قریب تھا۔

زلزلے کے جھٹکے ملیر، شاہ فیصل کالونی، لانڈھی، کورنگی، جعفر طیار، بکرا پیڑی اور گل احمد کے علاقوں میں واضح طور پر محسوس کیے گئے۔

لانڈھی کے فیوچر موڑ اور اسپتال چورنگی سمیت متعدد مقامات پر لوگ گھبراہٹ میں گھروں اور دفاتر سے باہر نکل آئے۔

زلزلہ پیما مرکز کے مطابق رات 1 بج کر 12 منٹ سے لے کر 1 بج کر 30 منٹ کے درمیان شہر میں تین بار زوردار جھٹکے محسوس کیے گئے، تاہم فوری طور پر کسی جانی یا مالی نقصان کی اطلاع نہیں ملی۔

حکام کی جانب سے شہریوں کو ہدایت کی گئی ہے کہ وہ افواہوں سے گریز کریں اور ایمرجنسی کی صورت میں ہیلپ لائنز سے رابطہ کریں۔