وزارت مذہبی امور نے 2026 حج کیلئے پیش بندی کے طور پر عازمین حج کی رجسٹریشن 4 سے 5 روز میں شروع کرنے کا فیصلہ کر لیاہے، جس کیلئے قبل از وقت رجسٹریشن کرانا لازمی ہو گا۔

ذرائع وزارت مذہبی امور کے مطابق سرکاری اور نجی دونوں اسکیموں کے لیے عازمین حج کو لازمی رجسٹریشن کرانا ہوگی، جبکہ رجسٹریشن کی درخواستوں کے ہمراہ مخصوص رقم(ٹوکن منی) بھی جمع کرانی ہوگی۔

ذرائع نے بتایا کہ ٹوکن منی مجموعی حج اخراجات میں شامل(ایڈجسٹ )کر لی جائے گی، رجسٹریشن کروانے والے درخواست گذار حج 2026 کے اہل تصور ہوں گے۔

ذرائع وزارت مذہبی امور کا کہنا ہے کہ حج رجسٹریشن ملک بھر میں منظور شدہ بینکوں  سے کرائی جا سکے گی، حج رجسٹریشن کے بعد عازمین سرکاری یا نجی حج اسکیم منتخب کر سکیں گے۔

یہ بھی پڑھیں: عازمین حج کو کس نے دھوکا دیا، سردار یوسف نے بتا دیا

ذرائع کے مطابق رواں برس پرائیویٹ اسکیم سے رہ جانے والے عازمین  کے لیے بھی رجسٹریشن لازمی ہو گی۔

سعودی وزارتِ حج  و عمرہ نے عازمین حج 2026 کے لیے رجسٹریشن کا عندیہ دے دیا ہے۔

ذرائع نے بتایا کہ حج رجسٹریشن حکومت سعودی عرب کی ہدایت پر کی جا رہی ہے، حج رجسٹریشن کے اعداد و شمار سے سعودی حکومت کو آگاہ کیا جائے گا، رجسٹریشن کی بنیاد پر حکومت سعودی عرب حج کوٹہ مقرر کرے گی۔

ذرائع کا کہنا یہ بھی ہے کہ حج رجسٹریشن درخواستوں کی وصولی کے لیے دو تین روز میں باقاعدہ اشتہار جاری کر دیا جائے گا۔