اسلام آباد: پاکستان پیپلز پارٹی نے وفاقی بجٹ 2025-26 کے معاملے پر حکومت کو سخت مؤقف اختیار کرنے کا فیصلہ کرلیا۔

پاکستان پیپلز پارٹی کا اس حوالے سے پارلیمانی پارٹی کا اہم اجلاس پارلیمنٹ ہاؤس میں جاری ہے جس میں آئندہ کی حکمت عملی پر غور کیا جا رہا ہے۔

پارلیمانی پارٹی کے اجلاس کی صدارت پارٹی کی سینئر قیادت کررہی ہے۔ اجلاس میں راجا پرویز اشرف، سید خورشید شاہ، اعجاز جکھرانی، مرزا آفاق بیگ اور شرمیلا فاروقی سمیت دیگر اہم ارکان شریک ہیں۔

ذرائع کے مطابق اجلاس کے دوران ارکان اسمبلی نے وفاقی حکومت کے رویے پر سخت تحفظات کا اظہار کیا اور شکایات کے انبار لگا دیے۔

وزیراعلیٰ سندھ کی بریفنگ

اجلاس میں وزیراعلیٰ سندھ سید مراد علی شاہ ویڈیو لنک کے ذریعے شریک ہوئے اور پارٹی ارکان کو سندھ کے صوبائی بجٹ کے اہم نکات سے آگاہ کیا۔ انہوں نے وفاق سے متعلق مالی امور پر بھی تفصیلی بریفنگ دی۔

پارٹی ذرائع کا کہنا ہے کہ اگر حکومت نے پیپلز پارٹی کے تحفظات دور نہ کیے تو وہ وفاقی بجٹ کی منظوری میں حکومت کا ساتھ نہیں دے گی۔ اس مؤقف سے حکومت کو پارلیمنٹ میں شدید چیلنج کا سامنا ہوسکتا ہے۔

علاوہ ازیں اجلاس میں چیئرمین بلاول بھٹو زرداری کی سربراہی میں قائم سفارتی کمیٹی کے کردار کو بھرپور انداز میں سراہا گیا۔ ارکان نے عالمی سطح پر پاکستان کا مؤقف اجاگر کرنے پر بلاول بھٹو کا شکریہ ادا کیا۔