اسلام آباد: وفاقی دارالحکومت کے سیکٹر جی-13 میں پیش آنے والے ایک افسوسناک واقعے میں نوجوان ٹک ٹاکر ثنا یوسف کو ان کے گھر میں فائرنگ کر کے قتل کردیا گیا ہے۔

 پولیس کے مطابق واردات میں ملوث شخص مقتولہ کا جاننے والا تھا، جو مہمان کے طور پر ان کے گھر آیا تھا۔

اسلام آباد پولیس کے ترجمان نے تصدیق کی کہ واقعہ تھانہ سمبل کی حدود میں پیش آیا۔ ابتدائی تحقیقات کے مطابق نامعلوم شخص نے گھر میں داخل ہو کر ثنا یوسف پر فائرنگ کی، جس کے نتیجے میں وہ موقع پر ہی جاں بحق ہوگئیں۔

پولیس ٹیم فوری طور پر جائے وقوعہ پر پہنچی اور شواہد اکٹھے کیے جبکہ مقتولہ کی لاش کو پوسٹ مارٹم کے لیے پمز اسپتال منتقل کر دیا گیا ہے۔

اسلام آباد پولیس کا کہنا ہے کہ ملزم واردات کے بعد موقع سے فرار ہوگیا، کیس کی تفتیش جاری ہے اور ملزم کی تلاش کے لیے مختلف مقامات پر چھاپے مارے جا رہے ہیں۔

اس حوالے سے تھانہ سمبل کے اسٹیشن ہاؤس آفیسر (ایس ایچ او) ملک آصف نے میڈیا کو بتایا کہ مقتولہ کو جس شخص نے قتل کیا وہ بظاہر ان کا جاننے والا معلوم ہوتا ہے اور مہمان کے طور پر ان کے گھر آیا تھا۔

 ان کا کہنا تھا کہ معاملے کی مختلف زاویوں سے تفتیش کی جارہی ہے اور جلد مقدمہ درج کر لیا جائے گا۔

پولیس ترجمان نے یقین دہانی کرائی کہ جیسے ہی کیس میں پیش رفت ہوگی، میڈیا اور عوام کو آگاہ کیا جائے گا۔

واضح رہے کہ ثنا یوسف کا تعلق چترال سے تھا، وہ اپنی فیملی کے ہمراہ اسلام آباد کے سیکٹر جی-13 میں مقیم تھیں، تاہم واقعے سے محض چند گھنٹے قبل انہوں نے انسٹاگرام پر اسلام آباد سے ایک ویڈیو بھی شیئر کی تھی۔