پنجاب پولیس نے خوارجی دہشت گردوں کے خلاف ایک بڑی کامیابی حاصل کی ہے۔ پولیس اور دہشت گردوں کے درمیان شدید فائرنگ کا تبادلہ کوٹ مبارک میں ہوا، جس کے نتیجے میں 4 خوارجی دہشت گرد ہلاک ہو گئے۔

ترجمان پنجاب پولیس کے مطابق، ہلاک دہشت گردوں کے قبضے سے بھاری اسلحہ اور گولہ بارود برآمد کیا گیا ہے۔

پولیس کی بروقت کارروائی نے علاقے میں موجود دیگر دہشت گردوں کے خلاف ایک بڑے سرچ آپریشن کی راہ ہموار کی، جس کے تحت مزید دہشت گردوں کی گرفتاری کے لیے کارروائیاں جاری ہیں۔

آرپی او ڈی جی خان سجاد حسن اور ڈی پی او سید علی کی قیادت میں پولیس ٹیمیں فیلڈ میں موجود ہیں اور دہشت گردوں کا قلع قمع کرنے کے لیے سرگرم ہیں۔

پنجاب پولیس کی اس کامیاب کارروائی پر آئی جی پنجاب ڈاکٹر عثمان انور نے پولیس کی ٹیموں کی پیشہ ورانہ مہارت اور عزم کو سراہا اور انہیں شاباش دی۔

انہوں نے کہا کہ پنجاب پولیس خوارجی دہشت گردوں کے خلاف سیسہ پلائی دیوار ہے اور ملک دشمن عناصر کے ناپاک عزائم کو ناکام بنانے کے لیے ہمہ وقت تیار ہیں۔

صدر مملکت آصف علی زرداری نے بھی اس کامیاب کارروائی پر پولیس افسران اور اہلکاروں کی بہادری کو خراج تحسین پیش کیا اور کہا کہ دہشت گردوں کے مکمل خاتمے تک قانون نافذ کرنے والے اداروں کی کارروائیاں جاری رہیں گی۔ ہمارا عزم دہشت گردی کے خاتمے اور ملکی دفاع کے لیے غیر متزلزل ہے۔

وزیراعظم شہباز شریف نے بھی پولیس کی کامیاب کارروائی کو سراہا اور کہا کہ دہشت گردی کے خلاف جنگ میں پوری قوم متحد ہے اور ہم اس کے خاتمے تک اپنی جنگ جاری رکھیں گے۔ جوانوں نے کامیاب کارروائی کر کے فتنہ الخوارج کے ناپاک عزائم کو خاک میں ملا دیا ہے۔