اسلام آباد: مشرق وسطیٰ میں بڑھتی ہوئی کشیدگی کے تناظر میں وزیراعظم شہباز شریف نے قطر اور سعودی عرب کے سفیروں سے علیحدہ علیحدہ ٹیلیفونک رابطے کیے اور حالیہ علاقائی صورتحال پر تبادلہ خیال کیا۔

وزیراعظم نے قطر کے سفیر علی مبارک علی عیسیٰ الخاطر سے گفتگو کے دوران امریکی فوجی اڈے پر ایرانی میزائل حملے کی اطلاعات پر گہری تشویش کا اظہار کیا۔

 انہوں نے قطر کی حکومت اور عوام کے ساتھ مکمل یکجہتی کا اظہار کرتے ہوئے کشیدگی میں کمی کی فوری ضرورت پر زور دیا، جس کے بعد قطری سفیر نے ہنگامی رابطے اور یکجہتی کے اظہار پر وزیراعظم کا شکریہ ادا کیا۔

اسی طرح وزیراعظم نے سعودی عرب کے سفیر نواف بن سعید المالکی سے بھی ہنگامی گفتگو کی اور مشرق وسطیٰ میں امن و استحکام کے لیے تمام فریقین کی جانب سے سفارتی ذرائع کے مکمل استعمال پر زور دیا۔

اس کے علاوہ وزیراعظم نے سعودی قیادت سے قریبی رابطے جاری رکھنے کے عزم کا اعادہ بھی کیا۔

دوسری جانب سعودی سفیر نے خطے میں امن کے لیے پاکستان کے تعمیری کردار کو سراہتے ہوئے مشترکہ کوششوں پر اتفاق کیا۔

وزیراعظم نے اس موقع پر یقین دہانی کروائی کہ پاکستان، سعودی عرب اور قطر کے ساتھ مل کر خطے میں امن کے فروغ کے لیے ہر ممکن تعاون جاری رکھے گا۔