واشنگٹن: چیف آف آرمی اسٹاف فیلڈ مارشل سید عاصم منیر کے حالیہ دورہ امریکہ کے دوران بین الاقوامی پالیسی ماہرین، سینئر اسکالرز، تجزیہ کاروں، تھنک ٹینک اداروں اور عالمی میڈیا کے نمائندوں سے تفصیلی ملاقاتیں ہوئیں، جن میں پاکستان کے علاقائی و عالمی مؤقف کو اجاگر کیا گیا۔

آئی ایس پی آر کے مطابق آرمی چیف نے امریکہ کے معروف تھنک ٹینکس سے ملاقاتوں میں پاکستان کے اصولی مؤقف، علاقائی سیکیورٹی اور عالمی استحکام کے لیے تعمیری کردار پر روشنی ڈالی۔

انہوں نے “معرکۂ حق” اور “آپریشن بنیان مرصوص” کے حوالے سے تفصیلی بریفنگ دی جبکہ انسداد دہشت گردی کے تناظر میں پاکستان کی قربانیوں اور مؤقف کو واضح کیا۔

فیلڈ مارشل عاصم منیر نے کہا کہ بعض علاقائی عناصر ہائبرڈ وارفیئر کے تحت دہشت گردی کو فروغ دے رہے ہیں لیکن پاکستان نے دہشت گردی کے خلاف جنگ میں کلیدی اور قائدانہ کردار ادا کیا ہے۔

انہوں نے پاکستان کی آئی ٹی، زراعت، معدنیات اور قدرتی وسائل کے شعبوں میں موجود صلاحیتوں کو اجاگر کرتے ہوئے بین الاقوامی شراکت داروں کو باہمی تعاون کے مواقع تلاش کرنے کی دعوت دی۔

آرمی چیف نے ملاقاتوں میں مکالمے، سفارتکاری اور بین الاقوامی قوانین کی پاسداری پر مبنی پاکستان کے اصولی مؤقف کو بھی اُجاگر کیا اور کہا کہ پاکستان ایک ذمہ دار ریاست کے طور پر خطے میں کشیدگی کم کرنے اور عالمی سلامتی کو یقینی بنانے میں سرگرم کردار ادا کر رہا ہے۔

اس کے علاوہ ملاقاتوں میں پاک-امریکہ طویل المدتی تعلقات، باہمی احترام، مشترکہ تزویراتی مفادات، اور اقتصادی شراکت داری پر بھی تفصیلی گفتگو کی گئی۔

 شرکاء نے آرمی چیف کے واضح، مؤثر اور شفاف مؤقف کو سراہا جبکہ امریکی ماہرین نے پاکستان کی مستقل اور اصولی پالیسیوں کی تعریف کی۔

آئی ایس پی آر کے مطابق یہ ملاقاتیں پاکستان کی اصولوں پر مبنی سفارتکاری، عالمی روابط اور مکالمے کے ذریعے پرامن بقائے باہمی کے عزم کی واضح عکاسی کرتی ہیں۔