سکیورٹی فورسز نے بھارتی پراکسی فتنہ الخوارج کی افغانستان سے پاکستان میں دراندازی کی کوشش ناکام بناتے ہوئے 30 خوارج ہلاک کر دیے۔

پاک فوج کے شعبہ تعلقات عامہ (آئی ایس پی آر) کے مطابق یکم اور دو جولائی 2025 کی درمیانی شب اور پھر 2 اور 3 جولائی کی درمیانی شب سیکیورٹی فورسز نے ضلع شمالی وزیرستان کے علاقے حسن خیل میں پاک افغان سرحد کے راستے دراندازی کی کوشش کرنے والے بھارت کے حمایت یافتہ فتنۃ الخوارج کے ایک بڑے گروہ کی نقل و حرکت کا بروقت پتا لگایا۔

یہ بھی پڑھیں: جہاد کا اعلان صرف ریاست کر سکتی ہے، کسی فرد یا گروہ کو یہ اختیار حاصل نہیں، ڈی جی آئی ایس پی آر

آئی ایس پی آر کے مطابق افواج پاکستان نے بھرپور پیشہ ورانہ مہارت اور مؤثر حکمتِ عملی کے تحت بھارتی سرپرستی میں کام کرنے والے خوارج کی دراندازی کی کوشش کو ناکام بنا دیا، اس کارروائی میں تمام 30 بھارتی حمایت یافتہ خوارج ہلاک کر دیے گئے، جبکہ ہلاک خوارج سے  بڑی مقدار میں اسلحہ، گولہ بارود اور دھماکہ خیز مواد بھی برآمد ہوا۔

آئی ایس پر آر کا کہنا ہے کہ سیکیورٹی فورسز نے پیشہ ورانہ مہارت، چوکسی اور تیاری کا شاندار مظاہرہ کرتے ہوئے ایک بڑے سانحے کو روک لیا۔

آئی ایس پی آر کے مطابق عبوری افغان حکومت  اپنی سرزمین کو غیر ملکی پراکسیز کے ذریعے پاکستان کے خلاف استعمال ہونے سے روکے، جبکہ سیکیورٹی فورسز قوم کے دفاع اور بھارتی سرپرستی میں دہشت گردی کے مکمل خاتمے کے لیے پرعزم ہیں۔