لیاری کے علاقے بغدادی میں عمارت گرنے کے بعد جاری ریسکیو آپریشن مکمل کر لیا گیا۔ اسسٹنٹ کمشنر لیاری شہریار حبیب نے میڈیا سے گفتگو کرتے ہوئے تصدیق کی کہ تقریباً 60 گھنٹے تک جاری رہنے والے سرچ اینڈ ریسکیو آپریشن کے دوران 27 افراد جاں بحق اور 10 زخمی ہوئے۔

اسسٹنٹ کمشنر کے مطابق، ریسکیو کارروائی میں تمام متعلقہ اداروں نے مربوط انداز میں حصہ لیا، جن میں فائر بریگیڈ، پولیس، رینجرز، کے ایم سی اور دیگر ایمرجنسی سروسز شامل تھیں۔

شہریار حبیب نے کہا کہ متاثرہ کمپلیکس سے متصل تمام عمارتوں کو بھی منہدم کرنے کا فیصلہ کر لیا گیا ہے تاکہ مستقبل میں کسی ناخوشگوار واقعے سے بچا جا سکے۔ ان کے مطابق، ڈسٹرکٹ ساؤتھ اور لیاری میں خستہ حال عمارتوں کے خلاف بڑا آپریشن شروع کیا جا رہا ہے، جہاں 51 عمارتوں کو انتہائی خطرناک قرار دیا گیا ہے۔

انہوں نے بتایا کہ حادثے کے مقام کے اطراف موجود تین عمارتوں کا معائنہ ایس بی سی اے (سندھ بلڈنگ کنٹرول اتھارٹی) کے ماہرین کریں گے، جن میں سے دو عمارتیں بظاہر مخدوش نظر آ رہی ہیں اور انہیں فوری طور پر گرانے کا فیصلہ کر لیا گیا ہے۔

اسسٹنٹ کمشنر کے مطابق، متاثرہ عمارتوں کے مکین محفوظ مقام پر منتقل ہو چکے ہیں اور حکومت متاثرین کو متبادل رہائش کی فراہمی کے لیے منصوبہ بندی کر رہی ہے۔ انہوں نے واضح کیا کہ غیرقانونی اور ناقص تعمیرات کے ذمہ دار افراد کے خلاف قانونی کارروائی عمل میں لائی جائے گی۔

شہریار حبیب کا کہنا تھا کہ اگر کسی سرکاری ادارے یا افسر کا ملوث ہونا ثابت ہوا تو اس کے خلاف بھی بلاامتیاز کارروائی کی جائے گی۔