اسلام آباد: پاکستان مسلم لیگ (ن) کی قیادت نے اعلان کیا ہے کہ کمیٹی آزاد کشمیر میں آئندہ الیکشن کے لیے اہم فیصلے کرے گی۔

پارٹی قیادت کے مطابق آزاد کشمیر میں آئندہ انتخابات کے پیشِ نظر مسلم لیگ (ن) نے تنظیمی اور انتخابی حکمت عملی کو حتمی شکل دینے کے لیے ایک اعلیٰ سطحی مشاورتی کمیٹی تشکیل دے دی ہے، یہ کمیٹی انتخابی معاملات سے متعلق اہم فیصلے کرے گی۔

وزیراعظم کے مشیر برائے سیاسی امور رانا ثناءاللہ کو اس کمیٹی کا کنوینر مقرر کیا گیا ہے جبکہ کمیٹی کا پہلا اجلاس ان کی زیر صدارت منعقد ہوچکا ہے، جس میں آئندہ انتخابی لائحہ عمل پر ابتدائی مشاورت کی گئی۔

وفاقی وزیر امور کشمیر انجینئر امیر مقام کو بھی کمیٹی میں شامل کیا گیا ہے جبکہ آزاد کشمیر مسلم لیگ (ن) کے صدر شاہ غلام قادر کو کمیٹی میں کلیدی کردار سونپا گیا ہے۔

 پارٹی قیادت کے مطابق یہ کمیٹی آزاد کشمیر کے تمام حلقوں میں پارٹی پوزیشن، امیدواروں کے چناؤ اور سیاسی اتحادیوں سے روابط جیسے اہم امور پر سفارشات مرتب کرے گی۔

مسلم لیگ (ن) کی قیادت نے اس اقدام کو آزاد کشمیر میں پارٹی کی انتخابی تیاریوں کے حوالے سے ایک اہم پیشرفت قرار دیا ہے۔