اقوام متحدہ میں پاکستان کے مستقل مندوب عاصم افتخار نے شام کی صورتحال پر اظہارِ خیال کرتے ہوئے اسرائیل کی جانب سے شام پر جاری حملوں کو شدید تنقید کا نشانہ بنایا ہے۔

پاکستانی مندوب عاصم افتخار نے کہا کہ یہ حملے بین الاقوامی قوانین کی کھلم کھلا خلاف ورزی اور خطے میں عدم استحکام کا سبب بن رہے ہیں۔

عاصم افتخار نے کہا کہ اسرائیل نہ صرف شام بلکہ غزہ، لبنان اور دیگر ریاستوں کی خودمختاری کو پامال کر رہا ہے، شامی ریاستی اداروں کو منظم طور پر کمزور کیا جا رہا ہے جو کہ ایک ناقابل قبول عمل ہے۔

انہوں نے زور دیا کہ شام کو اس وقت جارحیت کا نہیں بلکہ بین الاقوامی حمایت اور تعاون کا سامنا ہونا چاہیے۔

پاکستانی مندوب عاصم افتخار نے عالمی برادری سے اپیل کی کہ وہ شام کی تعمیر نو کے لیے سنجیدہ اور مشترکہ کوششیں کرے۔

عاصم افتخار نے مزید کہا کہ اسرائیلی جارحیت، جوابدہی کے فقدان اور بین الاقوامی برادری کی خاموشی کا نتیجہ ہے، جس کا خمیازہ عام شہریوں کو بھگتنا پڑ رہا ہے۔

 انہوں نے ایک بار پھر واضح کیا کہ پاکستان شامی عوام کے ساتھ مکمل یکجہتی کا اظہار کرتا ہے اور ہر ممکن حمایت جاری رکھے گا۔