لاہور: نجی گاڑیوں کے بعد اب پنجاب میں موٹر سائیکلوں کے لیے بھی فٹنس سرٹیفکیٹ لازمی قرار دے دیا گیا ہے۔

پنجاب میں اب موٹر سائیکلوں کا تکنیکی معائنہ کیا جائے گا اور معائنے کے بعد ایک سال کے لیے فٹنس سرٹیفکیٹ جاری کیا جائے گا۔

پنجاب کابینہ نے اس قانون میں ترمیم کی منظوری دے دی ہے جس کے بعد محکمہ ٹرانسپورٹ نئی پالیسی کے موثر نفاذ کے لیے حکمت عملی تیار کررہا ہے۔

دوسری جانب صوبے بھر میں ایل پی جی پر چلنے والی پبلک ٹرانسپورٹ کے خلاف کریک ڈاؤن بھی جاری ہے۔ اس مقصد کے لیے خصوصی اسکواڈز تشکیل دیے گئے ہیں جو تمام بڑے بس اڈوں پر معائنہ کرکے کارروائی کر رہے ہیں۔

ریجنل ٹرانسپورٹ اتھارٹی کے سیکرٹریز نے بھی غیر قانونی ایل پی جی سلنڈرز سے لیس گاڑیوں کے خلاف آپریشن شروع کردیا ہے۔ علاوہ ازیں ایسے ورکشاپس کے خلاف بھی کارروائیاں جاری ہیں جو غیر منظور شدہ رکشہ باڈی تیار کررہے ہیں۔