کراچی کے علاقے لیاری بغدادی میں 5 منزلہ عمارت گر گئی، جس کے نتیجے میں 7 افراد جاں بحق، متعدد ملبے تلے دب ہوئے ہیں۔

عمارت گرنے کے باعث تین خواتین سمیت  آٹھ افراد زخمی ہوئے جنہیں ملبے سے نکال لیا گیا ہے، زخمیوں کو ٹراما سینٹر منتقل کردیا گیا ہے تاہم ایک زخمی کی حالت تشویشناک ہے۔

ریسکیو 1122 ٹیم 1 ایمبولینس اور1 ڈزاسٹر رسپانس وہیکل کے  ہمراہ جائے وقوعہ پر موجود ہیں اور امداری کارروائیاں جاری ہیں، جبکہ ساتھ ہی واقع عمارت کو خالی کرایا جارہا ہے۔

ذرائع کے مطابق حادثے کے وقت 12 فیملیز فلیٹس میں موجود تھی، ملبے تلے 25 سے زائد افراد کے دبے ہونے کی اطلاع ہے۔

ریسکیو 1122 کے مطابق موبائل فون سگنل بند ہونے کی وجہ سے حادثہ دیر سے رپورٹ ہوا، حادثہ صبح نو بج کے 45 منٹ پر ہوا۔

ریسکیو ذرائع کا کہنا ہے کہ ڈی سی ساوتھ جاوید نبی کھوسو موقع پر موجود ہیں، علاقہ مکینوں نے ڈپٹی کمشنر ساؤتھ سے کہا کہ متعدد بار ہم آگاہ کر چکے ہیں لیکن ایس بی سی اے  کے افسرانوں کی غفلت اور لاپروائی کی وجہ سے اتنا بڑا حادثہ رونما ہوا۔

دوسری جانب ترجمان ایدھی کا کہنا ہے کہ ملبے سے مجموعی طور پر 7 لاشوں اور آٹھ زخمیوں کو نکالا جا چکا ہے۔