روم: اٹلی نے اعلان کیا ہے کہ وہ 2026 سے 2028 کے درمیان تقریباً پانچ لاکھ نئے ورک ویزے جاری کرے گا تاکہ ملک کو درپیش بڑھتی ہوئی مزدوروں کی کمی پر قابو پایا جاسکے۔

غیر ملکی خبر رساں ادارے کے مطابق اطالوی حکومت اگلے تین برسوں میں یورپی یونین سے باہر کے ممالک کے شہریوں کو لیگل امیگریشن کے ذریعے روزگار فراہم کرنے کا ارادہ رکھتی ہے۔

اس منصوبے کا مقصد مختلف شعبوں میں مزدوروں کی قلت کو پورا کرنا اور غیر قانونی ہجرت کو منظم طریقے سے قابو میں رکھنا ہے۔

صرف سال 2026 میں ہی اٹلی 1 لاکھ 64 ہزار 850 غیر ملکی کارکنوں کو قانونی طور پر ملک میں داخلے اور ملازمت کی اجازت دے گا جب کہ 2028 تک یہ تعداد 4لاکھ 97 ہزار 550 تک پہنچ جائے گی۔

یہ وزیرِاعظم جورجیا میلونی کے دورِ حکومت میں امیگریشن سے متعلق دوسرا بڑا اقدام ہے۔ اس سے قبل حکومت 2023 سے 2025 کے درمیان بھی ساڑھے چار لاکھ سے زائد ورک پرمٹ جاری کرنے کی منظوری دے چکی ہے۔

ایک طرف جہاں حکومت روزگار کے مواقع کے لیے قانونی امیگریشن کو فروغ دے رہی ہے، وہیں دوسری جانب وزیرِاعظم میلونی نے غیر قانونی تارکین وطن اور بحیرہ روم میں سرگرم انسانی ہمدردی کی تنظیموں کے خلاف سخت مؤقف اپنا رکھا ہے۔

اطالوی حکام کا کہنا ہے کہ یہ نیا ویزہ کوٹہ ملک میں مزدوروں کی طلب، سماجی اداروں کی تجاویز اور پچھلے برسوں میں موصول ہونے والی ورک پرمٹ درخواستوں کو مدِنظر رکھ کر طے کیا گیا ہے۔

اٹلی میں آبادی میں کمی بھی اس فیصلے کی ایک بڑی وجہ ہے۔ 2024 میں اموات کی تعداد پیدائش سے 2 لاکھ 81 ہزار زیادہ رہی جس کے باعث ملک کی کل آبادی 37 ہزار کی کمی کے ساتھ 5 کروڑ 89 لاکھ 30 ہزار پر آگئی ہے۔

ماہرین کا کہنا ہے کہ موجودہ آبادی کو برقرار رکھنے کے لیے اٹلی کو 2050 تک کم از کم ایک کروڑ نئے تارکین وطن کو خوش آمدید کہنا ہوگا۔