وزیراعظم محمد شہباز شریف سے آج اسلام آباد میں انڈونیشیا کے وزیر دفاع لیفٹیننٹ جنرل (ر) سیافری سمسودین نے ملاقات کی۔ ملاقات میں دونوں رہنماؤں کے درمیان دوطرفہ تعلقات، دفاعی تعاون اور مشترکہ مفادات پر مبنی منصوبوں پر تفصیلی تبادلہ خیال کیا گیا۔

وزیراعظم نے انڈونیشیا کے صدر پرابووو سوبیانٹو کے ساتھ قاہرہ میں ہونے والی G-8 سربراہی اجلاس کی خوشگوار ملاقات کا ذکر کرتے ہوئے ان کے لیے نیک تمناؤں کا اظہار کیا۔

ملاقات کے دوران پاکستان اور انڈونیشیا کے درمیان گہرے تاریخی، مذہبی، ثقافتی اور برادرانہ تعلقات پر گفتگو ہوئی۔

وزیراعظم نے گفتگو کرتے ہوئے کہا کہ دونوں ممالک عالمی فورمز پر ایک دوسرے کی بھرپور حمایت کرتے ہیں اور ان تعلقات کو مزید وسعت دینے کی ضرورت ہے۔

وزیراعظم نے انڈونیشیا کے ساتھ تجارت، دفاع، دفاعی پیداوار اور تزویراتی شعبوں میں تعاون کو فروغ دینے کے عزم کا اعادہ کیا جبکہ کثیر الجہتی شعبوں میں دوطرفہ تعاون کی اہمیت پر بھی زور دیا۔

انہوں نے انڈونیشیا کے ساتھ سرمایہ کاری اور باہمی مفاد پر مبنی منصوبوں میں شراکت داری کو بڑھانے کی خواہش ظاہر کی۔

اس کے ساتھ ساتھ وزیراعظم نے پاکستان اور انڈونیشیا کے مابین دفاعی تعاون کے معاہدے کے تحت جاری اقدامات کا بھی جائزہ لیا اور دونوں رہنماؤں نے اس معاہدے کے فوری نفاذ پر اتفاق کیا۔

لیفٹیننٹ جنرل (ر) سیافری سمسودین نے انڈونیشی صدر کی جانب سے وزیراعظم شہباز شریف اور پاکستانی عوام کے لیے نیک خواہشات پہنچائیں۔

انہوں نے پاکستان کے ساتھ دفاعی تعلقات کو مزید مستحکم کرنے اور بالخصوص دفاعی پیداوار سمیت دیگر شعبوں میں تعاون کے مزید امکانات تلاش کرنے کے عزم کا اظہار کیا۔