وفاقی وزیر داخلہ محسن نقوی نے پاکستان ایئر فورس کو رائل انٹرنیشنل شو میں  دو ٹرافیاں جیتنے پر زبردست الفاظ میں خراج تحسین پیش کیا ہے۔

وفاقی وزیر داخلہ محسن نقوی نے اس موقع پر کہا کہ پاک فضائیہ کے شاہینوں کو عالمی اعزازات پر دل کی گہرائیوں سے مبارکباد پیش کرتا ہوں۔

محسن نقوی کا کہنا تھا کہ رائل انٹرنیشنل ایئر شو 2025 میں پاکستان فضائیہ نے جے  ایف 17 تھنڈر  اورسی 130 ہرکیولس کی بدولت “کنکورز ڈی الیگینس” اور “کنکورز ڈی الیگینس” ٹرافیاں جیت کر تاریخ رقم کی ہے، یہ عالمی اعزازات پاک فضائیہ کی پیشہ ورانہ مہارت، جدید فضائی تیاری اور عالمی معیار کی تربیت کا منہ بولتا ثبوت ہیں۔

وفاقی وزیر داخلہ نے کہا کہ ایئر چیف مارشل ظہیر احمد بابر سندھو کی ولولہ انگیز قیادت میں پاک فضائیہ نے ایک بار پھر دنیا کو دکھا دیا کہ پاکستان کی فضاؤں کے محافظ ہر میدان میں تیار ہیں۔

محسن نقوی کا یہ بھی کہنا تھا کہ پاک فضائیہ کی ٹیم نے دنیا کے سب سے بڑے ایئر شو میں ایسا عملی مظاہرہ کیا جس نے دنیا کی بڑی فضائی قوتوں کو بھی داد دینے پر مجبور کر دیا، حالیہ پاک بھارت کشیدگی میں دشمن کے فضائی عزائم خاک میں ملانے والی پی اے ایف نے عالمی سطح پر بھی اپنی سبقت کا لوہا منوایا۔

وفاقی وزیر داخلہ نے کہا کہ یہ جیت ایک مضبوط اور خوددار پاکستان کا عالمی اعزاز ہے، جہاں جذبہ، علم اور ٹیکنالوجی قومی دفاع کے ستون ہیں، پی اے ایف  صرف ایک فضائیہ نہیں بلکہ قومی جذبے کا پرچم بردار ادارہ ہے، پی اے ایف کے  شاہینوں نے آسمان پر صرف طیارے نہیں، قوم کا وقار اور اعتماد بھی بلند کیا۔

محسن نقوی نے مزید کہا کہ یہ کامیابی نہ صرف ایک فضائی مظاہرہ ہے بلکہ ایک پیغام ہے۔پاکستان تیار ہے، ہر چیلنج کے لیے، ہر افق کے لیے، قوم اپنے شاہینوں، انجینیئروں اور قائدین کو سلام پیش کرتی ہے، جنہوں نے ایئر چیف مارشل ظہیر احمد بابر سندھو کی قیادت میں پاکستان کا نام فضاؤں سے اوپر بلند کر دیا۔