اسلام آباد: صدرمملکت آصف علی زرداری نے “فرنٹیئر کانسٹیبلری ری آرگنائزیشن آرڈیننس 2025” جاری کر دیا ہے، جس کے تحت فرنٹیئر کانسٹیبلری (ایف سی) کو ملک گیر فیڈرل فورس کا درجہ دے دیا گیا ہے، اب یہ فورس “فیڈرل کانسٹیبلری” کے نام سے جانی جائے گی۔

آرڈیننس کے مطابق فیڈرل کانسٹیبلری کو چاروں صوبوں، وفاقی دارالحکومت اسلام آباد، آزاد جموں و کشمیر اور گلگت بلتستان میں کام کرنے کا اختیار حاصل ہو گا، تاہم یہ آرڈیننس ایف سی ایکٹ 1915 میں کی گئی ترامیم کی منظوری کے بعد نافذ کیا گیا ہے۔

آرڈیننس میں بتایا گیا ہے کہ فیڈرل کانسٹیبلری کی کمان پولیس سروس آف پاکستان کے افسران کے سپرد ہو گی جبکہ فورس کا انسپکٹر جنرل وفاقی حکومت تعینات کرے گی، ہر ڈویژن میں ایک ونگ کمانڈر تعینات کیا جائے گا جس کا رینک ڈپٹی انسپکٹر جنرل (ڈی آئی جی) کے برابر ہو گا۔

فورس کی تنظیم نو کے تحت اسے دو حصوں میں تقسیم کیا گیا ہے، ایک سیکیورٹی ڈویژن اور دوسری فیڈرل ریزرو ڈویژن۔

آرڈیننس کے مطابق فیڈرل کانسٹیبلری کی ذمہ داریوں میں فسادات پر قابو پانا، داخلی سیکیورٹی، انسدادِ دہشتگردی اور عوامی تحفظ شامل ہوں گے۔

وفاقی حکومت قانون و امن قائم رکھنے کے لیے وفاقی ریزرو فورس بھی بھرتی کر سکے گی، اس مقصد کے لیے ملک بھر میں بھرتی کے دفاتر قائم کیے جائیں گے اور فیڈرل کانسٹیبلری سے متعلق باقاعدہ قواعد و ضوابط بھی تیار کیے جائیں گے۔