اسلام آباد: خیبرپختونخوا سے سینیٹ انتخابات کے لیے اپوزیشن جماعتوں کے درمیان تاحال کوئی متفقہ فارمولا طے نہیں ہوسکا۔

ذرائع کے مطابق پاکستان پیپلزپارٹی نے دیگر اپوزیشن جماعتوں کو مشورہ دیا ہے کہ وہ انتخابات میں مشترکہ حکمت عملی کے تحت حصہ لیں، تاکہ ووٹوں کے ضیاع سے بچا جا سکے۔

پیپلزپارٹی کی جانب سے ن لیگ، جمعیت علمائے اسلام (ف)، عوامی نیشنل پارٹی اور پی ٹی آئی پارلیمنٹرینز کو اتحاد قائم کر کے سینیٹ انتخابات میں حصہ لینے کی تجویز دی گئی ہے۔

ذرائع کے مطابق پیپلزپارٹی نے واضح پیغام دیا ہے کہ اپوزیشن جماعتیں “سولو فلائٹ” سے گریز کریں کیونکہ انفرادی فیصلے اجتماعی نقصان کا باعث بن سکتے ہیں۔

ذرائع کا کہنا ہے کہ پیپلزپارٹی کو امید ہے کہ ن لیگ، جے یو آئی، اے این پی اور پی ٹی آئی پی کی جانب سے مثبت ردعمل ملے گا، تاہم پی پی نے خیبرپختونخوا اسمبلی کے آزاد ارکان سمیت تمام جماعتوں سے ووٹ مانگنے کا فیصلہ کیا ہے۔

دوسری جانب ن لیگ اور جے یو آئی کے تعاون کی صورت میں پیپلزپارٹی دوسرے نمبر پر موجود اُمیدواروں کو ووٹ دینے پر بھی آمادہ ہے۔

ذرائع کے مطابق اپوزیشن جماعتیں اگر اتحاد قائم کرنے میں کامیاب ہو جاتی ہیں تو خیبرپختونخوا سے سینیٹ کی پانچ نشستیں حاصل کی جا سکتی ہیں، اس فارمولے کے تحت پیپلزپارٹی اور جے یو آئی کو دو، دو جبکہ ن لیگ کو ایک سیٹ ملنے کا امکان ظاہر کیا جا رہا ہے۔

ذرائع نے مزید بتایا کہ پیپلزپارٹی خیبرپختونخوا کے صدر محمد علی شاہ باچہ دیگر اپوزیشن جماعتوں سے رابطوں میں مصروف ہیں اور سینیٹ انتخابات کے لیے مشترکہ لائحہ عمل پر زور دے رہے ہیں۔