وزیراعظم محمد شہباز شریف نے اسلام آباد میں زیر تعمیر ٹیکنالوجی پارک کا دورہ کیا اور پارک کی تعمیر کی سست رفتار پر برہمی کا اظہار کیا۔

وزیراعظم نے آئی ٹی پارک کو جلد از جلد مکمل کرنے کی ہدایت دی اور کہا کہ اس منصوبے کو ابتدائی ہدایت کے مطابق بتائی گئی مدت میں مکمل کیا جائے، منصوبے میں عالمی معیار کے مطابق سہولیات کی فراہمی کو یقینی بنایا جائے، تمام ذمہ داران اس منصوبے کی تکمیل کے لیے اپنی کوششیں تیز کریں۔

اس دوران وزیراعظم کو بریفنگ دی گئی کہ آئی ٹی پارک، 2 زیر زمین، گراؤنڈ اور 9 بالائی منزلوں پر مشتمل ہے، پارک میں  دفاتر، انکیوبیشن سینٹر، بزنس سپورٹ سینٹر، R&D لیباٹریاں، لیول III ڈیٹا سینٹر، آڈیٹوریم اور 1,200 گاڑیوں کی پارکنگ شامل ہیں۔

بریفنگ میں مزید بتایا گیا کہ آئی ٹی پارک کا مقصد  نوجوانوں کے لیے نوکریاں، معاشی نمو کو بڑھانا، عالمی IT مسابقت کو بڑھانا اور ڈیجیٹل تقسیم کو ختم کرنا ہے۔