مظفر آباد: بھارت کی جانب سے ایک بار پھر آبی جارحیت کا مظاہرہ کیا گیا ہے، مقبوضہ کشمیر سے چھوڑا گیا پانی کا ریلا آزاد کشمیر میں داخل ہوگیا۔ اسٹنٹ ڈیزاسٹر منیجمنٹ اتھارٹی (ایس ڈی ایم اے) نے شہریوں کو احتیاطی تدابیر اختیار کرنے کی ہدایت کردی۔

بھارت نے آبی جارحیت کا سلسلہ جاری رکھتے ہوئے مقبوضہ کشمیر سے دریائے جہلم میں پانی چھوڑ دیا ہے۔

اسٹنٹ ڈیزاسٹر منیجمنٹ اتھارٹی (ایس ڈی ایم اے) کے مطابق بھارتی مقبوضہ علاقے سے چھوڑا گیا پانی کا ریلا کنٹرول لائن پر واقع چکوٹھی کے مقام سے آزاد کشمیر میں داخل ہوگیا۔

ایس ڈی ایم اے کا کہنا ہے کہ پانی کے بہاؤ میں مسلسل اضافہ ہورہا ہے جس کے باعث مظفرآباد، ہٹیاں بالا اور منگلا تک کے علاقوں میں پانی کی سطح بلند ہوسکتی ہے۔

حکام نے خبردار کیا ہے کہ دریا کے کناروں اور ندی نالوں کے قریب غیر ضروری آمد و رفت سے گریز کیا جائے تاکہ کسی بھی جانی نقصان سے بچا جاسکے۔

مزید برآں عوام کو ہدایت کی گئی ہے کہ وہ اپنے مویشی اور قیمتی سامان محفوظ مقامات پر منتقل کریں جب کہ بچوں کو دریاؤں اور برساتی نالوں کے قریب جانے سے سختی سے روکا جائے۔

ایس ڈی ایم اے نے بتایا کہ پانی کے بہاؤ کی مسلسل نگرانی کی جارہی ہے اور مقامی انتظامیہ کسی بھی ہنگامی صورتحال سے نمٹنے کے لیے الرٹ ہے۔